لاہور(پاکستان پوائنٹ نیوز13۔جولائی2017ء) ٹریفک قانون دی خلاف ورزی کرن والے موٹر سائیکل مالکاں لئی جرمانے وچ وادھا کر دتا گیا اے۔ تفصیل مطابق صوبائی راجدھانی وچ سٹی ٹریفک پولیس نے آئی جی پنجاب کیپٹن (ر) عثمان احمد خٹک نوں موٹر سائیکل دے جرمانے وچ وادھے دی سمری گھلی اے۔ سمری مطابق ٹریفک قانون دی خلاف ورزی کرن والیاں خلاف جرمانے وچ 50فیصد یعنی 100رُپئے وادھا کیتا جا رہیا اے۔
وادھے مگروں ہن گھٹو گھٹ چالان 200رُپئے توں ودھا کے 300رُپئے تے 300توں ودھا کے 400رُپئے کر دتا گیا اے۔ سیف سٹی کیمریاں دی فوٹیج دا جائزا لین مگروں ایہ گل ساہمنے آئی اے کہ بُہتی ٹریفک قانون دی خلاف ورزی موٹر سائیکل والے کردے نیں۔ دوجے پاسے قائم مقام آئی جی پنجاب کیپٹن (ر) عثمان احمد خٹک نے سٹی ٹریفک پولیس ولوں گھلی گئی سمری منظوری لئی پنجاب حکومت نوں گھل دتی اے۔
