لاہور (پاکستان پوائنٹ نیوز16۔اگست 2016ء) پاکستان تحریک انصاف دے رکن اسمبلی ڈاکٹر مراد د اس نے پنجاب وچ 1200 غیر معیاری دوائیاں دے حوالے نال قرارداد پنجاب اسمبلی سیکرٹریٹ وچ جمع کروا دِتی۔ جہدے وچ دسیا گیا اے کہ پنجاب دے مقدس ایوان، تے ڈرگ ریگولیٹری اتھارٹی نے مطالبا کیتا اے کہ رجسٹرڈ دوائیاں دی جانکاری لئی آفیشل ویب سائٹ بنائی جاوے کیوں جے ڈرگ انسپکٹراں کول غیر معیاری تے غیر رجسٹرڈ دوائیاں چیک کرن دا کوئی طریقا کار نہیں تے نہ ای شہریاں کول ایہ سہولت موجود اے کہ اوہ انٹرنیٹ دے ذریعے کسے دوائی دے صیح ہون یاں نہ ہون دا پتا کر سکن۔
یاد رہوے کہ محکما صحت پنجاب تے چیف منسٹر ٹاسک فورس برائے جعلی و غیر معیاری دوائیاں دیاں کوششاں دے باوجود پنجاب بھر وچ 1200 غیر معیاری، غیر رجسٹرڈ کمپنیاں دوائیاں ویچ رہیاں نیں۔ ڈاکٹراں دے مطابق ڈرگ انسپکٹراں دی ناقص کم کاری پاروں میڈیکل سٹوراں اُتے غیر معیاری تے جعلی دوائیاں دی ویچ وٹک نہیں رُک رہی۔یاد رہوے کہ 2011 وچ پنجاب انسٹی ٹیوٹ آف کارڈیالوجی وچ دل دیاں دوائیاں وچ ملیریا دی دوائی مکس ہون نال 149 موتاں ہوئیاں سن۔ ایہدے بعد توں ہُن تیکر غیر رجسٹرڈ تے جعلی دوائیاں دی ویچ وٹک نہیں رُکی۔
