اسلام آباد(پاکستان پوائنٹ نیوز07۔جولائی2017ء) نجی ٹی وی چینل دے پروگرام وچ گل بات کردے ہوئے ڈاکٹر شاہد مسعود نے ڈالر دی قدر وچ اچن چیت وادھے بارے اندر دی کہانی بیان کر دتی۔ تفصیل مطابق ڈاکٹر شاہد مسعود دا کہنا سی کہ پچھلے دیہاڑے وفاقی وزیر خزانا اسحاق ڈار نے قوم نوں چونا لایا اے۔ ڈالر دی قیمت وچ جو وادھا ہویا اے ایس وجہ کر کے ہویا کہ ’آئی بی‘ بنک جو کسارے وچ جا رہیا سی نوں مُل لین لئی ’مسلم کمرشل ‘ بنک نے دس کروڑ ڈالر مارکیٹ توں اچن چیت چُکے تے اسحاق ڈار سُتے رہے۔
جہدے نال ای بنکاں نے وی مارکیٹ توں ڈالر کڈھ لئے ۔ ہویا انج کہ جے تہاڈے کول اک لکھ ڈالر سن تے ڈالر دا ریٹ اُتے تھلے ہون نال تن ہزار چھ سو رُپئے ایہدے توں نکل گئے۔ تے تہاڈا اک لکھ روپیہ 96ہزار ہو گیا۔ ڈالر د ی قیمت وچ اچن چیت وادھے نال ایس ملک دے ہر بندے اُتے گیارھاں ہزارتوں ودھ رُپئے ہور قرض چڑھ گیا اے ۔ اوہناں نے آکھیا کہ ایہ جاندے جاندے قوم نوں چونا لا رہے نیں۔ تے ایہدی جوڈیشل انکوائری ہونی چاہیدی۔ اوہناں دا کہنا سی کہ ایہناں نے پیغام گھلیا اے کہ جے پاناما کیس یاں جے آئی ٹی دے فیصلے دے نتیجے وچ ملک اندر سیاسی طور اُتے عدم استحکام آﺅندا اے تے اسیں ایہ جھٹکا وی دے سکدے آں کیونکہ ایہ سارے بنک تے اوہدے سربراہ ایہ سارے ساڈیاں جیباں وچ نیں۔
