اسلام آباد (پاکستان پوائنٹ نیوز15۔اگست 2016ء) تحریک انصاف نے قومی اسمبلی وچ وزیر اعظم نواز شریف خلاف ریفرنس جمع کروا دِتا۔ ریفرنس پی ٹی آئی دے رہنما مخدوم شاہ محمود قریشی، شیریں مزاری تے ہور رہنماواں ولوں سپیکر نوں جمع کروایا گیا اے۔ تفصیل دے مطابق پیر دے دیہاڑے تحریک انصاف دے رہنماواں نے وزیر اعظم نواز شریف خلاف سپیکر قومی اسمبلی ایاز صادق ہوراں نوں ریفرنس اوہناں دے دفتر وچ جمع کروایا جہدے وچ موقف اختیار کیتا گیا اے کہ پاناما لیکس دے بعد وزیر اعظم نواز شریف صادق تے امین نہیں رہے ایس لئی اوہناں دی قومی اسمبلی دی رکنیت منسوخ کیتی جاوے تے اوہناں نوں وزارت عظمی لئی نااہل قرار دِتا جاوے۔
یاد رہوے کہ ایس توں پہلے تحریک انصاف تے پیپلز پارٹی نے الیکشن کمیشن وچ وی وزیر اعظم نواز شریف خلاف ریفرنس دائر کیتا سی جدکہ تحریک انصاف نے اک وار فیر وزیر اعظم خلاف ریفرنس سپیکر قومی اسمبلی نوں جمع کروایا اے۔ جہدے وچ موقف اختیار کیتا گیا اے کہ وزیر اعظم نوں آرٹیکل 63/62 دے تحت نااہل قرار دِتا جائے۔
