پاراچنار(پاکستان پوائنٹ نیوز30۔جون2017ء) آرمی چیف نے اج پارا چنار دا دورا کیتا۔ آئی ایس پی آر مطابق آرمی چیف اج سویرے پارا چنار گئے جتھے اوہناں نوں سکیورٹی صورتحال تے پچھلے دِنا ہون والے دہشت گردی دے واقعات اُتے بریفنگ دتی گئی۔ ایس موقعے اُتے آرمی چیف نے مقامی عمائدین تے دھرنے دے نمایندیاں نال ملاقات کیتی۔ آرمی چیف نے پارا چنار دھمکیاں دے شہیداں لئی دعا کیتی۔
آرمی چیف نے قیمتی انسانی جاناں دے چلے جان اُتے ہرکھ دا وکھالا کیتا۔ آئی ایس پی آر مطابق دھماکے نال شہید ہون والے بندیاں دے وارثاں تے دھرنے دے نمایندیاں نال گل بات کردے ہوئے آرمی چیف نے آکھیا کہ جدوں دھماکا ہویا میں اوس ویلے باہرلے ملک سی، واپسی اُتے موسم خراب سی جس کارن ایتھے نہیں آ سکیا۔ یقین کرو مینوں بہت دُکھ اے کسے دا بھرا تے کسے دا پُتر چلا گیا۔
آرمی چیف نے آکھیا کہ جدوں دھماکا ہویا تے میں ترکی وچ سی تے اوسے رات میں واپس پہنچ گیا۔ آرمی چیف دا کہنا سی کہ دھماکے دے مقامی سہولت کاراں نوں پھڑ لیا اے جہناں دا مقدما ہن فوجی عدالت اندر چلایا جائے گا۔ ہر پاکستانی میرے لئی برابر اے بھاویں اوہ غیر مسلم ہوئے یاں مسلمان۔ آرمی چیف دا کہنا سی کہ پارا چنار پاکستان دا حصہ اے اک اک انچ تے اک اک بندے لئی اہم اے۔
ایس موقعے تے آرمی چیف نے دھرنا نمایندگان نوں یقین دہانی کروائی کہ دھماکے دی تھاں مجمعے اُتے ایف سی اہلکاراں دی فائرنگ دیاں تحقیقات ہون گیاں۔ مجمعے اُتے فائرنگ دے ذمے واراں خلاف کارروائی کیتی جائے گی۔ آرمی چیف نے دسیا کہ ایف سی کمانڈر پارا چنار نوں بدل دتا گیا اے۔ سکیورٹی لئی پارا چنار وچ وادھو نفری وی گھلی گئی اے۔ ایس موقعے تے آرمی چیف دا کہنا سی کہ فوج پارا چنار وچ ٹراما سینٹر بنائے گی۔
