پاناما لیکس دے مسئلے اُتے حکومت مخالف تحریک چلان دے سوا کوئی رستا نہیں: اعتزاز احسن

پاناما لیکس دے مسئلے اُتے حکومت مخالف تحریک چلان دے سوا کوئی رستا نہیں: اعتزاز احسن

اسلام آباد (پاکستان پوائنٹ نیوز15۔اگست 2016ء) پاکستان پیپلز پارٹی دے سینئر رہنما چودھری اعتزاز احسن نے آکھیا اے کہ پاناما لیکس دے مسئلے اُتے حکومت مخالف تحریک چلان دے سوا ہُن ہور کوئی رستا نہیں اے۔ نجی ٹی وی نال گل بات کردے ہوئے اعتزاز احسن دا کہنا سی کہ پاناما لیکس دے مسئلے نوں حل کرن لئی نہ تے حکومت کوئی قانون بنانا چاہندی اے تے نہ ای اوہ اپنا احتساب چاہندی اے۔

اک سوال دے جواب وچ اوہناں دا کہنا سی کہ بلاول تے عمران اک کنٹینر اُتے نظر نہیں آن گے۔ پر کیوں جے ہُن رستا ای موجود نہیں تے ساڈی جماعت وی ہُن سڑکاں تے آن دا فیصلا کرے گی۔اوہناں دا ایہ وی کہنا سی کہ جدوں تحریکاں چلن تے مقصد اک ای ہووے تے رستے مل سکدے نیں۔چودھری نثار دے حوالے نال گل بات کردے ہوئے اوہناں دا کہنا سی کہ چوہدری نثار دی ایس معاملے وچ اینی اہمیت نہیں، کیوں کہ پاناما لیکس وچ ناں تے وزیر اعظم دے گھر والیاں دے شامل نیں۔

اوہناں نے آکھیا کہ چوہدری نثار اپنی جماعت نوں مسلم لیگ نثار بنان دی جِنی وی کوشش کرن پر حکومت تے مسلم (ن) دی ای اے۔ اعتزاز احسن نے آکھیا کہ پیپلز پارٹی دی تحریک مسلم لیگ (ن) تے نواز شریف دے خلاف ہووے گی۔ یاد رہوے کہ پیپلز پارٹی حکومت توں پہلے ای حکومت خلاف پاکستان تحریک انصاف پشاور توں احتساب ریلی دا آغاز کر چکی اے۔ پی ٹی آئی چیئرمین عمران خان پہلے ای ایہ آکھ چکے نیں ایس وار ساریاں اپوزیشن جماعتاں وی اوہناں دے نال ہون گیاں تے ساریاں پارٹیاں دا اکو مطالبا ا ے کہ پاناما لیکس دے مسئلے تے وزیر اعظم دا احتساب کیتا جاوے۔

یاد رہوے کہ پاناما لیکس دے انکشاف دے بعد پی ٹی آئی سنے ساریاں اپوزیشن جماعتاں نے وزیر اعظم نواز شریف دے احتساب دا مطابا کیتا سی۔ پر پاناما لیکس دے حوالے نال ٹرمز آف ریفرنسز اُتے اتفاق نہ ہون پاروں تحریک انصاف نے 7 اگست نوں احتساب تحریک دا آغاز کیتا اے۔