لاہور (پاکستان پوائنٹ نیوز13۔اگست 2016ء) پاکستان پیپلز پارٹی دے رہنما سینیٹر چوہدری اعتزاز احسن نے آکھیا اے کہ لاہور وچ بالاں دے اغوا دے کیساں توں ڈاڈھا پریشان آں۔ اوہناں نے آکھیا کہ لاہور وچ ماواں تشویش پاروں بالاں نوں گھروں باہر نہیں جان دیندیاں لاہور تے زندہ دلاں دا، دلیر لوکاں دا شہر اے پر اپنے بالاں دے معاملے اُتے کوئی دلیر نہیں ہوندا۔
اعتزاز احسن نے آکھیا کہ لاہور وچ بالاں دے اغوا دے ودھدے ہوئے کیساں اُتے پولیس حکام نال ملاقات کیتی تے ملاقات وچ ایس حوالے نال اپنے خدشیاں دا اظہار کیتا اے۔ لاہور وچ میڈیا نال گل بات کردے ہوئے اوہناں دا کہنا سی کہ حکومت بارے میری واضح رائے اے کہ ایہ حکومت ناکام تے کرپٹ اے، اوہناں دا کہنا سی کہ شریف برادران نے اپنیاں دُکاناں کھولیاں ہوئیاں نیں۔
اورنج لائن تے میٹرو اُتے اعتراض نہیں پر اوہناں دی لاگت اُتے تحفظات نیں۔ اوہناں دا کہنا سی کہ ایہناں منصوبیاں نال لکھاں بندیاں دا فائدا ہووے گا، پر شریف برادران نے ایہناں منصوبیاں دی آڑ وچ ڈاڈھا کمیشن لیا۔ اوہناں نے آکھیا کہ پاناما لیکس وچ شریف برادران دی چوری پھڑی گئی اے، پاناما لیکس اوہناں دے گلے وچ گھنٹی وانگ وجھدی رہوے گی تے ایہ لوک پاناما لیکس توں نس نہیں سکن گے۔
چوہدری نثار دے بیان دے ردعمل وچ اوہناں نے آکھیا کہ چوہدری نثار نے آپ آکھیا اے کہ اوہناں نے زندگی وچ اک وار صرف آصف علی زرداری دی تعریف کیتی، جو انسان پیپلز پارٹی دے اینا خلاف اے میں اوہدی گل نوں سنجیدگی نال نہیں لیندا۔ اوہناں دا کہنا سی کہ کوئی بے وقوف ہووے گا جو چوہدری نثار علی دے کول ایان علی تے ڈاکٹر عاصم دی سفارش لے جاوے گا۔ اوہناں نے آکھیا کہ چوہدری نثار سفارش لیان والے بندے دا ناں دس دین۔
اوہناں نے ہور آکھیا کہ ایل پی جی دا کوئی کوٹہ نہیں لیا۔ ایل پی جی دا کوٹہ اوس ویلے لِتا سی جدوں چوہدری نثار وزیر پٹرولیم سی۔ اوہناں نے آکھیا کہ ہُن میں ڈردے ہوئے ائر پورٹ اُتے کسے نال سیلفی نہیں لیندا بلکہ پہلے اوہدے کولوں پُچھنا واں کہ اوہ کدھرے عزیز بلوچ تے نہیں۔ اوہناں نے ہور آکھیا کہ موجودا حکومت نہیں چاہندی کہ احتساب ہووے کیوں کہ جے احتساب ہویا تے اوہناں دیاں ارباں دیاں چوریاں تے ڈکیتیاں پھڑیاں جان گیاں۔
