سیاست ٹیسٹ میچ یاون ڈے نہیں، سیاست عبادت دا درجہ رکھدی اے۔

وزیر اعظم نواز شریف سیاست بولن توں پہلے تولنا سکھاندی اے، مخالفاں دے منہ وچ جو آوندا اے بولی جاندے نیں، ملک وچ بجلی دی صورتحال وچ دن بدن بہتری آ رہی اے۔ تن ورھے پہلاں سفر شروع کیتا تے رستے ای نہیں سن: شورکوٹ وچ خطاب

سیاست ٹیسٹ میچ یاون ڈے نہیں، سیاست عبادت دا درجہ رکھدی اے۔
وزیر اعظم نواز شریف سیاست بولن توں پہلے تولنا سکھاندی اے، مخالفاں دے منہ وچ جو آوندا اے بولی جاندے نیں، ملک وچ بجلی دی صورتحال وچ دن بدن بہتری آ رہی اے۔ تن ورھے پہلاں سفر شروع کیتا تے رستے ای نہیں سن: شورکوٹ وچ خطاب

شورکوٹ (پاکستان پوائنٹ نیوز13۔اگست 2016ء) وزیر اعظم نواز شریف دا کہنا اے کہ سنجیدا سیاست ایویں نہیں ہوندی، مخالف ساڈے منصوبیاں اُتے خش نہیں نیں، سیاست ون ڈے یا ٹیسٹ میچ نہیں، عبادت دا درجہ رکھدی اے، سیاست بولن توں پہلے تولنا سکھاندی اے، مخالفاں دے منہ وچ جو وی آوندا اے بولی جاندے نیں۔ اوہناں دا کہنا سی کہ آزاد کشمیر وچ جو زبان بولی گئی اوہ سبھ نے سُنی، سنجیدا سیاست کنٹینر اُتے چڑھ کے نہیں ہوندی، کشمیری عوام نے گندی زبان دی سیاست نوں رد کر دِتا اے۔

اوہناں نے آکھیا کہ عوام نوں ہرے باغ وکھان والے کدی وی کامیاب نہیں ہو سکدے تے نہ ای ملک دشمن اپنے بھیڑے مقصداں وچ کامیاب ہون گے۔ وزیر اعظم نے آکھیا کہ قوم مخالفاں دی تے ساڈی سیاست دا موازنہ کرے، عوام احتجاج دی نہیں ترقی دی سیاست دا ساتھ دیوے۔ تفصیل دے مطابق شور کوٹ دے دورے دے دوران وزیر اعظم نواز شریف نے ایم 4 شور کوٹ توں خانیوال سیکشن دی نینہ رکھن دی تقریب نال خطاب کردے ہوئے آکھیا کہ مینوں شور کوٹ آکے بہت خشی ہو رہی اے۔

اوہناں نے آکھیا کہ ملک وچ بجلی دی صورتحال وچ دن بدن بہتری آ رہی اے۔ تن ورھے پہلاں سفر شروع کیتا تے رستے ای نہیں سن۔ اسیں ملک دے ہر طبقے دی خدمت کیتی تے کھاد دیاں قیمتاں نوں گھٹ کیتا جہدے نتیجے وچ ہُن کسان ملک وچ خشحالی دا مقام حاصل کرسکے گا۔ اوہناں دا کہنا سی کہ معیشت بہت تیزی نال بہتری ول جا رہی اے۔ اج جس طرحاں وی لوڈشیڈنگ دے مسئلے اُتے کم ہو رہیا اے اوہ سبھ دے سامنے اے۔

وزیر اعظم نواز شریف نے آکھیا کہ اسیں حکومت وچ آکے انفراسٹرکچر تے مواصلات دا سفر شروع کیتاتے ایہ سلسلہ چین دی سرحد توں شروع ہوندا اے۔ اسیں پورے ملک دے حصیاں نوں آپسی وچ جوڑاں گے۔چین بارے اوہناں دا کہنا سی کہ اوہ ساڈا بہترین دوست اے جہدی مثال نہیں ملدی تے ایس لئی چین دے سفیر اج ایتھے آئے نیں۔ وزیر اعظم نے آکھیا کہ 1999 وچ اسیں لاہور توں اسلام آباد تے اسلام آباد توں پشاور موٹروے بنائی۔

ساڈے جان دے بعد 17 ورھیاں وچ موٹروے اُتے کوئی کم نہیں کیتا گیا۔اوہناں نے آکھیا کہ 1999 وچ ساڈے کول وڈی ماترا وچ بجلی موجود سی۔ ماضی وچ پاکستان دی معیشت دا حال بُرا کیتا گیا۔ اقتدار سنبھالیا تے پاکستان دی معیشت ڈِگ رہی سی تے اج کوئی وی پاکستان نوں ناکام ریاست نہیں کہہ رہیا پر اسیں ایس توں وی اگانہ جانا اے۔ وزیر اعظم نے آکھیا کہ اسیں ملک وچ سڑکاں دا جال وچھا دِتا ایہ سبھ ساڈے وژن دا نتیجا اے۔

کیوں کہ اسیں دور دا سوچنے آں۔ اوہناں نے آکھیا کہ موٹروے دا سلسلہ گوادر تیکر جاوے گا۔ اوہناں دا ہور کہنا سی کہ کراچی وچ تھر تے پورٹ قاسم وچ بجلی دے کارخانے لگے نظر آ رہے نیں۔ ملتان تے بہاولپور دا کنکشن وی فوری اوتھوں ہونا چاہیدا اے جدکہ تاپی گیس دا منصوبا ساڈی گیس دی کمی نوں پورا کرے گا۔ وزیر اعظم نے آکھیا کہ حیدر آباد کراچی موٹروے آن والے ورھے مکمل کر لِتی جاوے گی۔

اوہناں نے آکھیا کہ ساڈے ملک وچ منصوبیاں دی نینہ رکھ کے رہنما اسلام آباد ٹُر جاندے نیں پر میں نینہ اودوں رکھاں گا جدوں کم شروع ہو جاوے گا۔ اوہناں دا کہنا سی کہ بلوچستان وچ وی سڑکاں دا اک نواں جال بجھ رہیا اے تے ایہ نیٹ ورک گوادر نوں خیبرپختونخوا نال جوڑے گا۔ تقریب نال خطاب کردے ہوئے وزیر اعظم نواز شریف نے 2018 توں پہلے بجلی دی لوڈشیڈنگ ختم کرن دا وی اعلان کیتا۔