اسلام آباد(پاکستان پوائنٹ نیوز08۔جون2017ء) مسلم لیگ( ن) دے رہنما سینیٹر مشاہد اللہ خان نے آکھیا اے کہ ایرانی پارلیمنٹ اُتے حملے دی مذمت کردے آں، دہشت گردی دے خاتمے لئی ریاستاں تے قوماں نوں کردار ادا کرنا چاہیدا۔ افغانستان نال چنگے تعلقات رکھنا چاہندے آں۔ جمعرات نوں پارلیمنٹ ہاﺅس باہر میڈیا نال گل بات کردے ہوئے اوہناں نے آکھیا کہ ایرانی پارلیمان اُتے حملے جہدی ذمے واری داعش نے قبول کیتی ہوئے یاں کسے ہور نے اوہدی جِنی مذمت کیتی جائے گھٹ اے۔
دہشت گردی دے حوالے نال ریاستاں تے قوماں نوں کردار ادا کرنا چاہیدا۔ اوہناں نے آکھیا کہ افغانستان تے ایرا ن نال چنگے تعلقات دے خاہشمند آں۔ افغان لوکائی نال پاکستان دے چنگے تعلقات نیں، حکومتاں تے بدلدیاں رہندیاں نیں۔ ایران نال دوستاں والے تعلقات نیں پاکستان ایران نال مشکل ویلے وچ کھلوتا اے۔ اک سوال دے جواب وچ اوہناں نے آکھیا کہ جے آئی ٹی دے دو افسراں دا تعلق مدعی پارٹی نال اے، حسین نواز دا فون لے لین تے سوشل میڈیا اُتے تصویر جاری کرن ورگیاں گلاں نال جے آئی ٹی اپنے آپ نوں جھیڑوا بنا رہی اے۔
اک ہور سوال دے جواب وچ اوہناں نے آکھیا کہ میں باہرلے ملک علاج لئی گیا تے اپنے خرچے نال ہوٹل دے خرچے برداشت کیتے۔ اک نجی ٹی وی چینل نے الزام لایا ایہ خرچے پی آئی نے دتے۔ ایہ الزام غلط نیں، جے ٹی وی چینل ایہ الزام ٹھیک ثابت کر دےوے تے سیاست چھڈ دیواں گا جے اوہ نہ ثابت کر سکے تے اپنی سزا آپ مِتھن۔
