لاہور(پاکستان پوائنٹ نیوز06۔جون2017ء) سینئر پرچاکا سہیل وڑائچ نے آکھیا اے کہ حسین نواز دی تصویر نال مظلومت دا تاثر پیدا ہویا اے، اسحاق ڈار تے مریم نواز نوں وی اوسے کمرے وچ بِہنا پئے گا، حکومت کول پچھانہ ہٹن دا کوئی چارا نہیں اے، شریف فیملی غیر جانبداری دا معاملا لے کے سپریم کورٹ جا سکدی اے، جہدے اُتے سپریم کورٹ وی اپنی رائے بدل سکدی اے۔
اوہناں نے نجی ٹی وی دے پروگرام کامران خان نال گل بات کردے ہوئے آکھیا کہ حکومتی وزیر مریم اورنگزیب، سعد رفیق تے ہوراں دے بیاناں توں لگدا اے کہ اوہ جے آئی ٹی دی کارروائی توں مطمئن نہیں نیں، اوہناں نوں انج لگ رہیا اے جیویں اوہناں خلاف انتقامی کاروائی کیتی جا رہی اے۔ ہو سکدا اے کہ جے آئی ٹی دی انکوائری لئی حکمت عملی سخت بنائے گئی ہووے۔
پر کارروائی دوران کوئی خوف و ہراس دی فضا والا معاملا نہیں اے۔ افسر سوال پُچھدے ہون گے، سارے وڈے سینئر افسر نیں ساہنوں اوہناں اُتے اعتماد کرنا چاہیدا۔ سہیل وڑائچ نے تصویر والے معاملے اُتے آکھیا کہ حسین نواز دی تصویر جاری کرن والے دا خیال ہووے گا کہ دنیا نوں وکھایا جائے کہ ایہ شہزادے عدالتاں وچ پیشی ویلے کِنے بے بس تے لاچار نظر آﺅندے نیں پر اک دن مگروں معاملا اُلٹ ہو گیا۔
احتساب بیورو نے شرمیلا فاروقی دی والدا نوں پھڑیا، اوہناں دی والدا تے شرمیلا فاروقی نوں تھانے بٹھایا گیا۔ اک تصویر ساہمنے آئی جہدے وچ شرمیلا فاروقی دی والدہ نماز پڑھ رہی اے پر اوہ کول بیٹھی رو رہی اے۔ ایسے طرحاں حسین نواز دی تصویر نال وی مظلومیت دا تاثر پیدا ہویا اے۔ اوہناں نے اک سوال دے جواب وچ آکھیا کہ اسحاق ڈار تے مریم نواز نوں وی ایسے کمرے وچ بِہنا پئے گا کیونکہ حکومت کول ہن پچھانہ ہٹن دا کوئی چارا نہیں اے پر شریف فیملی سپریم کورٹ جا سکدی اے کہ معاملا غیر جانبدار نہیں ہو رہیا۔
