اسلام آباد(پاکستان پوائنٹ نیوز30۔مئی2017ء) وزیر اعظم نواز شریف دے پُتر حسین نواز نے آکھیا اے کہ قانون دا احترام کردے ، جے آئی ٹی نے چھ گھنٹے تیک قانون دی پاسداری لئی جو سوال کیتے اوہناں دے جواب دتے، سانوں اپنی عزت پیاری اے۔ جے آئی ٹی ساہمنے پیشی مگروں میڈیا نال گل بات کردے ہوئے حسین نواز دا کہنا سی کہ جے آئی ٹی جدوں وی بُلائے گی پیش ہواواں گا۔
اوہناں نے آکھیا کہ جے آئی ٹی نے جو ثبوت منگے اوہ دتے گئے نیں، آن والے ویلے وچ وی جو ثبوت منگے جان گے پیش کراں گا۔ اوہناں نے آکھیا کہ قانونی حقاں توں ہٹ کے کوئی کاغذ پیش نہیں کیتا جائے گا، وثوق نال کہنا واں کہ میرے والد، بھین، بھرا یاں میرے اُتے کوئی غلط شے ثابت نہیں ہو سکے گی۔ اوہناں دا کہنا سی کہ ساڈے اُتے لائے گئے الزام جھوٹھے نیں جے آئی ٹی وچ کُجھ ثابت نہیں ہووے گا۔
اوہناں دا کہنا سی کہ اسیں قانون دااحترام کردے آں۔ اک سوال دے جواب وچ حسین نواز نے آکھیا کہ جی آئی ٹی دے دو ممبراں دا میرے نال جس طرحاں دا وی سلوک سی اوہنوں چھڈو، جے اوہناں دا رویہ ٹھیک نہ ہویا تے میں فیر عدالت جاواں گا۔ اوہناں نے آکھیا کہ میں بے گناہ آں، روزے نال ہون دے مگروں وی سارے سوالاں دے جواب دتے پر جے اوہناں یاں اوہناں دے خاندان بارے غیر مناسب رویہ اختیار کیتا گیا تے اوہ فیر عدالت جان گے۔
