’اے آر وائی نیوز‘ نوں پیمرا ولوں نفرت کھلارن اُتے نوٹس جاری

’اے آر وائی نیوز‘ نوں پیمرا ولوں نفرت کھلارن اُتے نوٹس جاری

اسلام آباد(پاکستان پوائنٹ نیوز25۔مئی2017ء) پاکستان الیکٹرانک میڈیا ریگولیٹری اتھارٹی (پیمرا) نے ٹی وی چینل ’اے آر وائی نیوز‘ دے پروگراماں وچ پاکستانی فوج خلاف نفرت کھلارن تے جھیڑوا مواد چلان اُتے چینل نوں نوٹس جاری کردے ہوئے پہلی جون 2017نوں سد لیا اے۔ پہلا نوٹس ٹی وی چینل اُتے 10مئی 2017نوں ڈان لیکس دے حوالے نال اُچیچی ٹرانسمیشن کارن جاری کیتا گیا اے، ذکر کیتے گئے پروگرام وچ اک پرچاکار ارشد شریف نے پاکستانی فوج خلاف مَندے اکھر ورتے تے فوج دے شعبہ تعلقات عاما ولوں اک ٹویٹ نوں واپس لتے جان اُتے غیر ذمے وار تبصرا کردے ہوئے ایہنوں 1971دے دُکھانت نال جوڑیا۔

ذکر کیتے گئے پرچا کار دی ایہ جھیڑوی تشبیہ پاکستان دے بہادر افسر تے جوان جو دہشت گردی خلاف جاری جنگ وچ قربانیاں دے رہے نیں،اوہناں وچ نفرت کھلارن دے زمرے وچ آﺅندی اے۔ ایسے طرحاں تبصرے نال پاکستانی فوج دا مورال ڈِگان دی کوشش کیتی گئی اے۔ دوجا نوٹس سی سی ٹی وی چینل دے اک پروگرام ’دی رپورٹرز‘ جو 16مئی 2017وچ عارف حمید بھٹی دے تبصرے کارن جاری کیتا گیا اے۔

عارف حمید بھٹی نے پاک فوج وچ اک من گھڑت تے اپنے آپ ولوں کیتے گئے سروے دا ذکر کیتا۔ پیمرا دے لائسنس دی حیثیت نال ’اے آر وائی نیوز‘ دی ذمے واری اے کہ اوہ ملکی آئین، قانون تے ریگولیٹر ولوں دِتے گئے ضابطے اُتے پوری طرحاں عمل کرے۔ پیمرا ولوں جاری کیتے گئے نوٹس وچ ’اے آر وائی‘ دے چیف ایگزیکٹو افسر نوں دتی گئی تاریخ نوں ذاتی حیثیت نال سددے ہوئے تے دوویں پروگراماں اُتے وکھو وکھ وضاحت منگی اے۔ جواب جمع نہ کروان اُتے ذاتی شنوائی توں غیر حاضری دی صورت وچ چینل خلاف اک پاسی کارروائی کیتی جائے گی۔