اسلام آباد (پاکستان پوائنٹ نیوز10۔اگست 2016ء) وزیر اعظم نواز شریف نے آکھیا اے کہ دہشت گرداں دے بزدلانا حملے سانوں کمزور نہیں کر سکدے تے اسیں دشمن دے ناپاک عزائم نوں مٹی وچ رلا دیاں گے۔ قومی اسمبلی دے اجلاس نال خطاب کردے ہوئے وزیر اعظم نواز شریف نے آکھیا کہ کوئٹہ دُکھانت پاروں دل بہت دُکھی اے، دہشت گردی دا ہر واقعا ساڈے عزم نوں ہور مضبوط کردا اے، پر اسیں دہشت گردی نوں ہر صورت ختم کراں گے تے پہلے توں زیادا طاقت نال اگے ودھاں گے۔
اوہناں نے آکھیا کہ کوئٹہ دھماکا کرن والے اوہی عناصر نیں جہناں نے بے نظیر بھٹو نوں قتل کیتا، آرمی پبلک سکول دے معصوم بالاں نوں نشانا بنایا گیا، صفورا گوٹھ وچ معصوم شہریاں تے کوئٹہ وچ ہزارا برادری نوں نشانا بنایا۔ اوہناں دا کہنا سی کہ پاکستان دا ہر طبقہ دہشت گردی توں متاثر اے، پر ساڈا اتحاد ای ایہناں نوں مات دے سکدا اے۔وزیر اعظم نے آکھیا کہ کوئٹہ دُکھانت اُتے پوری قوم غم وچ مبتلا اے، اپنے پیاریاں دی شہادت اُتے دُکھ اے۔
اوہناں دا ہور کہنا سی ایہ اوہی لوک نیں جہناں نے بے نظیر بھٹو نوں شہید کیتا۔ ہر قیمت اُتے دہشت گرداں دے نظریے نوں شکست دیاں گے۔ وزیر اعظم نے اپنے خطاب وچ آکھیا کہ دہشت گرد ساڈے عزم نوں مات نہیں دے سکدے ۔ اوہناں دا کہنا سی کہ پاکستان مخالف طاقتاں نوں بلوچستان وچ امن پسند نہیں آیا۔ دہشت گرداں دا مقابلا کرن لئی اکٹھے ہونا ضروری اے۔ قوم دا اکٹھ ای شیطانی طاقتاں دا مونہ توڑ جواب دے سکدا اے۔
پاکستان دے عوام،فوج تے پولیس دہشت گردی خلاف اکٹھے نیں۔ وزیر اعظم نے آکھیا کہ دہشت گرداں دے بزدلانا حملے سانوں کمزور نہیں کر سکدے، ساڈا اتحاد ای اوہناں نوں مات دے سکدا اے۔ وزیر اعظم نے آکھیاکہ پاک چین اقتصادی راہداری دا منصوبا ساڈے دشمناں نوں ہضم نہیں ہو رہیا۔اوہناں نے آکھیا کہ کوئٹہ وچ ہائی کورٹ بار دے صدر دی ٹارگٹ کلنگ دے بعد ہسپتال وچ وکیلاں تے پرچا کاراں نوں دہشت گردی دا نشانا بنایا گیا، ایہ واقعا باقاعدا منصوبا بندی دے تحت ہویا جہدے پِچھے کم کرن والا ذہن ڈاڈھا مکروہ اے۔
اوہناں دا کہنا سی کہ ایہ اوہی ذہن اے جو پاکستان تے خاص کر بلوچسان وچ امن و امان دی صورتحال نوں بہتر ہوندے نہیں ویکھ سکدا، پر اسیں ایہناں دے عزائم نوں مِٹی وچ رلا دیاں گے۔ اوہناں دا کہنا سی کہ ہندوستان دے انتظام ہیٹھ کشمیر وچ ہندوستانی فوج دے ظلماں خلاف پاکستان نے بھرپور انداز وچ آواز چُکی تے اسیں کشمیر دے موجودا حالات وچ چُپ نہیں رہ سکدے۔
