لاہور(پاکستان پوائنٹ نیوز10۔اگست 2016ء) وفاقی خفیا ایجنسی ولوں حساس اداریاں نوں خبردار کیتاگیا اے کہ دہشت گرد پاک بھارت سرحدی علاقیاں وچ دہشت گردی دیاں کارروائیاں کر سکدے نیں۔ وفاقی خفیا ایجنسی ولوں جاری خط وچ آکھیا گیا اے کہ پنجاب وچ بھارت تے پاکستان دی سرحد اُتے دہشتگراں ولوں حملے دا خدشا اے۔ قومی انسداد دہشتگردی اتھارٹی نے سیکرٹری محکما داخلا پنجاب نوں اک خط گھلیا اے کہ مبینا طور اُتے تحریک طالبان فضل اللہ گروپ آزادی دیہاڑاُتے لاہور واہگہ بارڈر تے قصور وچ گنڈا سنگھ بارڈر اُتے فوجی پریڈ نوں نشانا بنان دا منصوبا بنا رہیا اے۔
اک بیان وچ دسیا گیا اے کہ گھٹو گھٹ دو آپ مارو حملا آور نوں سرحد اُتے حملے لئی گھلیا گیا اے۔ خط وچ کسے وی دُکھانت توں بچن لئی حفاظتی اقدامات کرن اُتے زور دِتا گیا اے۔ ذمے وار وسیلیاں دا آکھنا اے کہ دہشت گرد آزادی دیہاڑ دیاں تقریباں دے موقع اُتے عوامی اکٹھاں نوں نشانا بنا سکدے نیں۔ آزادی دیہاڑ نوں واہگہ بارڈ اُتے ہون والی پریڈ ویکھن لئی ملک بھر توں لوگ لاہور آوندے نیں تے ہزاراں بندے ایس موقع اُتے اوتھے موجود ہوندے نیں۔ وسیلیاں دا آکھنا اے کہ پاک بھارت سرحد دے نیڑے پنڈاں وچ خفیا اداریاں دی نگرانی ودھا دتی گئی اے جدکہ کجھ مشکوک بندیاں نوں وی گرفتار کر لیا گیا اے۔
