اسلام آباد(پاکستان پوائنٹ نیوز22۔مئی2017ء) سوشل میڈیا اُتے قومی اداریاں خلاف مَندا بولن والیاں خلاف ایف آئی اے دا ہفتے توں کریک ڈاﺅن جاری اے۔ ایف آئی اے دے انسداد دہشت گردی ونگ نے سوشل میڈیا اُتے فوج خلاف مواد پوسٹ کرن والے بندیاں نوں رات گئے گرفتار کر کے ضمانت اُتے چھڈ دتا۔ وسیلیاں مطابق ایف آئی اے دی کارروائی اج وی جاری رہوے گی جدکہ ہور مشکوک بندیاں نوں تفتیش وچ شامل کرن لئی نوٹس جاری کر دتے گئے نیں۔
وسیلیاں مطابق پی ٹی آئی دے کُجھ ارکان جہناں وچ اویس خان تے سالار خان وی شامل سن اوہناں نوں رات ویلے گرفتار کیتا گیا سی پر اوہنا ں نوں ضمانتی مچلکیاں اُتے رہا کر دتا گیا اے جدکہ فوج خلاف مَندا بولن دے معاملے اُتے اج وی تحقیقات جاری رہن گیاں۔ ایف آئی اے نے سارے مشتبہ بندیاں نوں نوٹس جاری کر دتے نیں۔ ایس ویلے مشتبہ بندیاں دی گنتی 30اے جدکہ اجے تک ایف آئی اے دیاں تحقیقات پوریاں نہیں ہوئیاں۔
رپورٹ مکمل ہون اُتے ملزماں خلاف مقدمے درج کیتے جان گے۔دوجے پاسے اویس دا والد سابق آرمی افسر اے، اوہناں دا کہنا سی کہ اوہ آپ محب وطن اے تے اوہ 1977دی جنگ وچ وی رلت سی، اوہ ایس طرحاں قومی اداریاں بارے سوچ وی نہیں سکدے۔ اویس دے والد دا کہنا سی کہ اوہناں دے پُتر خلاف انکوائری پوری ہو گئی اے۔
