نواز شریف کئی گھنٹے اسلامی کانفرنس نال خطاب دی تیاری کردے رہے پر اوہناں نوں تقریر دا موقع ای نہیں دتا گیا، پاکستان عالمی دنیا وچ تنہائی دا شکار

اسلام آباد(پاکستان پوائنٹ نیوز22۔مئی2017ء) سعودی دارالحکومت ریاض وچ پچھلے دیہاڑے ہون والی امریکا عرب و اسلامی کانفرنس وچ پاکستان دے اُچیچے نمائندے نال بہت سارے غلط واقعات ہوئے پر سبھ توں وڈی انہونی پاکستانی سربراہ نواز شریف نال ایہ ہوئی کہ اوہناں نے تن گھنٹے تیک خطاب دی تیاری کیتی پر اوہناں نوں خطاب دا موقع تک نہیں دتا گیا۔ وسیلیاں دے مطابق ایس کانفرنس وچ پاکستانی پرچاکاراں دا اک وفد وی گیا ہویا سی جہناں نے ایس سارے معاملے اُتے تجزیا کردے ہوئے بہت سارے انکشافات کیتے۔

پرچا کاراں دا کہنا سی کہ پاکستان عالمی دہشت گردی دا اک اُچیچا تے متحرک رکن ہون دے نال نال واحد اسلامی ایٹی ریاست اے پر اوہناں نوں تقریردا موقع نہ دینا چنگی گل نہیں۔ وزیراعظم نے تقریبن ڈھائی گھنٹے اپنے ساتھیاں نال تقریر دی تیاری کیتی۔ اوہناں نوں لگ رہیا سی کہ کانفرنس دوران اوہناں نوں تقریر کرن دا بھرپور موقع دتا جائے گا کیونکہ سعودی وزیر خارجا تقریر وچ رلت دی دعوت لئی آپ پاکستان آئے سن۔ دوجے پاسے ایس حوالے نال پاکستان ولوں پرچا کاراں نوں کوئی وی بریفنگ دین لئی موجود نہیں سی کہ وزیر اعظم نوں تقریر دا موقع کیوں نہیں دتا گیا جدکہ پاکستان دے مقابلے وچ کئی دوجے ملکاں نوں تقریر دا موقع دتا گیا۔