غداری کیس: پرویز مشرف نوں فوج دی سکیورٹی دین دی شرط قبول نہیں: پراسکیوٹر اکرم شیخ

اسلام آباد(پاکستان پوائنٹ نیوز17۔مئی2017ء) سابق صدر پرویز مشرف غداری کیس وچ پراسیکیوٹر اکرم شیخ نے اُچیچی عدالت وچ جواب جمع کروا دتا۔ اکرم شیخ نے دلائل دِتے کہ عدالت نے پرویز مشرف نوں اشتہاری قرار دتا ہویا اے۔ پرویز مشرف جدوں تک سرینڈر نہیں کردا اوہدا وکیل وی پیش نہیں ہو سکدا۔ اوہناں نے آکھیا کہ وفاقی حکومت پرویز مشرف نوں سکیورٹی دین لئی تیار اے کیونکہ ملک دے ہر شہری نوں سکیورٹی دینا حکومت دی ذمے واری اے۔ اکرم شیخ نے آکھیا کہ پرویز مشرف نوں فوج دی سکیورٹی دین دی پیشگی شرط قبول نہیں۔ چیتے رہوے کہ پرویز مشرف دے وکیل نے پچھلی سنوائی دوران اوہناں نوں فوج دی سکیورٹی دین بارے آکھیا سی۔