نویں پاکستان دا حشر ویکھنا اے تے خیبرپختونخوا وچ ویکھو: نواز شریف

نویں پاکستان دا حشر ویکھنا اے تے خیبرپختونخوا وچ ویکھو: نواز شریف

چیچہ وطنی(پاکستان پوائنٹ نیوز11۔مئی2017ء) وزیر اعظم میاں نواز شریف نے آکھیا اے کہ نویں پاکستان دا حشر ویکھنا اے تے خیبرپختونخوا وچ ویکھو۔تفصیل دے مطابق اج چیچہ وطنی وچ جلسے نال خطاب کردے ہوئے وزیر اعظم نواز شریف دا کہنا سی کہ چیچہ وطنی نال میرا بڑا پرانا تعلق اے، میں نکا جہیا سی جدوں چیچہ وطنی آیا کردا سی، مینوں محبت اے چیچہ وطنی والیاں نال، اج محبت دا رشتہ ہور مضبوط کرن آیا واں، چیچہ وطنی والیاں نے نواز شریف تے مسلم لیگ (ن) نوں محبت نال ووٹ دتا، میں تہاڈی سپورٹ دا شکر گزار آں، مینوں پتا اے کہ چیچہ وطنی دے لوک نواز شریف نال نیں۔

وزیر اعظم نے آکھیا کہ میں اوہناں لوکاں نوں جو نت نویں بیان دیندے نیں نہیں پتا کہ پاکستان دا کلچر کیہ اے، پاکستان دا کلچر احترام تے پیار دا کلچر اے۔ اوہناں نوں نہیں پتا کہ ایہ رشتہ کیہ ہوندا اے۔ ایہ جو مونہ وچ آوے آکھ دیندے نیں ، بھئی حساب دینا پئے گا، اسیں وی 5سال دا حساب دیواں گے۔ مخالفاں نوں تنقید دا نشانا بناندے ہوئے اوہناں دا کہنا سی کہ پنجاب تے اسلام آباد وچ تیزی نال ترقی ہو رہی اے، پر مخالفاں دے سکولاں تے ہسپتالاں دا مَندا حال اے، سڑکاں وی ٹُٹیاں نیں۔ اوہناں نے آکھیا کہ پہلے یوریا 1800رُپئے پر اج 1400رُپئے دا ہو گیا اے۔ ڈی اے پی 4000 ہزار رُپئے پر اج 2500 رُپئے دی اے۔