اسلام آباد(پاکستان پوائنٹ نیوز11۔مئی2017ء) پاکستان وچ تعینات افغان سفیر عمر زاخیل وال دا کہنا اے کہ افعانستان وچ امن دے قیام لئی پاکستان توں بہتر کوئی سہولت کار نہیں ہو سکدا۔ تفصیل دے مطابق افغانستان وچ امن دے حوالے نال منعقد بین الاقوامی کانفرنس نال خطاب کردے ہوئے افغان سفیر دا کہنا سی کہ افغانیاں توںودھ کوئی مخلص نہیں، ساڈے کردار اُتے شک نہ کیتا جائے۔
امن دے قیام لئی پاکستان نوں سہولت کار قرار دیندے ہوئے افغان سفیر نے آکھیا کہ پاکستان تے بھارت رلکے کوششاں کرن تے امن قائم ہو سکدا اے، جدکہ ایران تے سعودی عرب دا تعاون وی افغانستان وچ امن دے قیام لئی اہم اے، نال ای خطے وچ جاری امن دیاں کوششاں اُتے گل کردے ہوئے اوہناں دا کہنا سی کہ ایس بارے گل کرن توں پہلے امن دا مطلب سمجھنا ضروری اے، 2001وچ امریکی اتحاد ساہمنے واضح نشانے سن پر ویلا لنگھن مگروں دھندلا منظر ساہمنے آیا۔
اوہناں نے سوال کیتا کہ دہشت گردی خلاف جنگ اک غلطی سی؟ نال ای افغانستان وچ امن دے قیام لئی مخلص علاقائی تعاون تے کوششاں اُتے زور دیندے ہوئے اوہناں دا کہنا سی کہ امن دے قیام لئی بہت سارے کم شروع کیتے گئے نیں پر اوہناں دی افادیت اُتے کئی سوالیا نشان کھڑے ہوندے نیں۔ خطے وچ داعش دے ودھدے ہوئے اثر اُتے عمر زاخیل نے آکھیا کہ داعش خطے وچ پل رہی اے، طالبان تے داعش وچکار وی اقتدار دی لڑائی اے پر طالبان نوں کجھ ملکاں دی حمایت حاصل اے۔
