لاہور(پاکستان پوائنٹ نیوز28۔اپریل2017ء) صوبائی وزیر قانون رانا ثنااللہ نے آکھیا اے کہ الزام خان دے پریڈ گراﺅنڈ اسلام آباد وچ جلسے دے مقصد غیر آئینی نیں۔ اوہناں دا مقصد عدالتاں تے اداریاں نوں دباءوچ لیانا اے، ایہ ہر عزت دار دی عزت اُچھالنا اپنا مقصد سمجھدے نیں، ایہ یاد کروانا چاہندے نیں کوئی عزت بچانا چاہندا اے تے اوہناں دی خاہش مطابق ایکٹ کرے۔
تفصیل دے مطابق صوبائی وزیر قانون رانا ثنااللہ نے پنجاب اسمبلی دے باہر میڈیا نال گل بات کردے ہوئے آکھیا کہ پی ٹی آئی نے عدالت دے فیصلے نوں بہت اُچھالیا اے، اج اسلام آباد دا اجلسہ سپریم کورٹ دے فیصلے دی توہین اے۔ سپریم کورٹ دے فیصلے دی روشنی وچ اختلافی نوٹ نوں ابھارنا غیر آئینی اے۔ ہن ایہ لوک ڈاﺅن ول نہیں جان گے۔ قوم نوں ایہناں دی غنڈا گردی روکنی پئے گی۔
اوہناں نے آکھیا کہ ہن جدوں سپریم کورٹ دا فیصلا آگیا اے تے پی ٹی آئی اوہنوں منے وی۔ عمران خان سپریم کورٹ تے جے آئی ٹی دے اداریاں نوں دباءوچ لیانا چاہندے نیں۔ رانا ثنااللہ نے آکھیا کہ پی ٹی آئی چیئرمین عمران خان نوں 10ارب تے کیہ دس رُپئے وی نہیں دتے جا سکدے۔ اوہناں دا کہنا سی کہ مسلم لیگ نے فیصلا کیتا اے کہ بحران خان نوں ہور مہلت نہ دتی جائے، عمران خان دے بیان خلاف وزیر اعلا پنجاب قانونی کارروائی کرن جا رہے نیں۔ اوہناں دا کہنا سی کہ اسیں سویرے قرآن دی تلاوت کردے آں ایہ لوک اطالوی گارڈ فادر دے حوالے بھالدے نیں۔
