اسلام آباد(پاکستان پوائنٹ نیوز15۔اپریل2017ء) کلبھوشن یادیو نوں موت دی سزا سنائے جان مگروں بھارت نے اوہدی سزا خلاف ڈاڈھا رویا پاندے ہوئے عالمی برداری وچ پاکستان نوں بدنام کرن دی بھرپور کوشش کیتی ا ے پر ہن پاکستان نے ملک وچ بھارتی مداخلت دا اک نواں ڈوزئیر تیار کر لیا اے۔ تفصیل دے مطابق نویں تیار کیتے گئے ڈوزئیر وچ ملک اندر بھارتی مداخلت دے ہور ثبوت شامل کیتے گئے نیں جہناں نوں پیش کر کے عالمی برادری نوں دسیا جائے گا کہ بھارت کلبھوشن یادیو دے معاملے اُتے پاکستان خلاف صرف پراپیگنڈا کر رہیا اے جہنوں پاکستان رد کرد ا اے۔
ڈوزئیر وچ کلبھوشن یادیو دا اعترافی بیان، کورٹ مارشل جنرل دے فیصلے دی کاپی، کلبھوشن دے ساتھیاں سنے پاکستان وچ سرگرمیاں دی ٹائم لائن، دہشت گردی دیاں کارروائیاں، کلبھوشن دی نشان کاری اُتے گرفتاریاں، کلبھوشن دی مدد نال ہون والے دہشت گردی دے واقعات، کلبھوشن یادیو دی عدالتی کارروائی دی ٹائم لائن تے اوہدے عدالتی بیان شامل کیتے گئے نیں۔ نواں تیار کیتا گیا ڈوزئیر سلامتی کونسل دے مستقل ممبراں، پاکستان وچ تعینات غیر ملکی سفیراں، عالمی برداری تے اقوام متحدہ سنے ہور عالمی اداریاں نوں گھلیا جائے گا۔ ذکر کیتے گئے ڈوزئیر نوں عالمی برداری ساہمنے پیش کر کے بھارت دا اصل مونہ ساہمنے لیاندا جائے گا۔
