لاہور(پاکستان پوائنٹ نیوز13۔اپریل2017ء) چین دے قونصل جنرل لنگ ڈنگ بن نے آکھیا اے کہ وزیر اعلا پنجاب میاں شہباز شریف نے پنجاب وچ سی پیک دے منصوبیاں نوں چھیتی نال اگانہ ودھیا اے تے وزیر اعلا پنجاب میاں محمد شہباز شریف دے کم دی سپیڈ غیر معمولی حد تک حیران کر دین والی اے۔ پنجاب وچ سی پیک دے منصوبیاں دا علا معیار تے سپیڈ ویکھ کے بہت خشی ہوئی اے، صوبے وچ منصوبیاں نوں مثالی رفتار نال اگانہ ٹورن دا کریڈٹ بغیر شک دے شہباز شریف نوں جاندا اے۔
چینی قونصل جنرل نے ایہناں خیالاں دا اظہار اج چینی کمپنی ’ڈیگانگ‘ دے چیئرمین گوآن جیان زونگ دی سربراہی وچ وزیر اعلا نال ملاقات دوران کیتا۔ چینی قونصل جنرل نے وزیر اعلا نال گل بات کردے ہوئے آکھیا کہ تہاڈے کم دی رفتار تے محنت دا اعتراف چین وچ وی کیتا جاندا اے ۔تُسیں پاک چین تعلقات نوں ودھوتری تے سی پیک دے منصوبیاں نوں تیزی نال اگانہ ودھان وچ اہم کردار ادا کیتا اے۔ تہاڈا سی پیک دے منصوبیاں وچ تعاون تحسین جوگ اے۔ اوہناں نے آکھیا کہ شہباز شریف چھیتی نال کم دے نتیجے حاصل کردے نیں۔ چینی قونصل جنرل نے دسیا کہ میں پچھلے دیہاڑے اورنج لائن میٹرو ٹرین منصوبے دا دورا کیتا تے منصوبے اُتے کم دا معیار بہت چنگا اے جہنوں ویکھ کے بڑی خشی ہوئی۔
