سینیٹ دا ناں ہاؤس آف فیڈریشن رکھ دتا گیا

اسلام آباد (پاکستان پوائنٹ نیوز05۔اگست 2016ء) چیئرمین سینیٹ میاں رضا ربانی نے آکھیا اے کہ 1973 وچ سابق سینیٹر عبدالحئی بلوچ نے سینیٹ دا ناں ہاؤس آف نیشنل ایزم رکھن دی تحریک پیش کیتی سی جہدے بعد ہُن اسیں ایہدا ناں ہاؤس آف فیڈریشن رکھ دِتا اے۔ جمعے نوں ایوان بالا دے اجلاس دوران چیئرمین سینیٹ رضا ربانی نے دسیا کہ جدوں 1973 دا آئین تیار ہو رہیا سی تے اوس ویلے سابق سینیٹر عبدالحئی بلوچ قومی اسمبلی دے رکن سن تے اوہناں نے سینیٹ دے حوالے نال جو اپنی پہلی تحریک پیش کیتی سی اوہدے وچ اوہناں نے آکھیا کہ سینیٹ دا ناں ہاؤس آف نیشنل ایزم ہونا چاہیدا۔ اوہناں نے آکھیا کہ 1973 وچ عبدالحئی بلوچ نے تجویز پیش کیتی جہدے بعد ہُن اسیں سینیٹ دا ناں ہاؤس آف فیڈریشن رکھ دِتا اے۔