اسلام آباد(پاکستان پوائنٹ نیوز06۔اپریل2017ء) ترجمان دفتر خارجا نفیس زکریا نے آکھیا اے کہ سعودی عرب دی قیادت وچ اسلامی ملکاں دا فوجی اتحاد کسے دے حق وچ نہ ای کسے اسلامی ملک خلاف، سعودی عرب تے ایران دوویں مسلم بھرا ملکاں نال پاکستان دے چنگے تعلقات نیں، پاکستان امریکا ولوں پاک بھارت مذاکرات وچ ثالثی دی پیشکش دا خیرمقدم کردا اے، بھارت لائن آف کنٹرول اُتے سیز فائر دی خلاف ورزی کر رہیا اے عالمی برادری اوہدا نوٹس لوے۔
ایہناں خیالاں دا اظہار دفتر خارجا دے ترجمان نفیس زکریا نے جمعرات دے دیہاڑے ہفتہ وار بریفنگ دیندے ہوئے کیتا۔ نفیس زکریا نے اک سوال دے جواب وچ آکھیا کہ سعودی قیادت وچ فوجی اتحاد نہ کسے دے حق وچ اے تے نہ ای کسے ملک خلاف اے، پاکستان دے سعودی عرب تے ایران نال چنگے تعلقات نیں، اجے تک اسلامی ملکاں دے فوجی اتحاد دےاں شرطاں طے نہیں ہوئیاں، ایس حوالے نال ہور معلومات لئی وزارت دفاع نال رابطا کیتا جائے۔
ترجمان نے آکھیا کہ پاکستان اقوام متحدہ وچ امریکی مستقبل مندوب ولوں پاک بھارت وچکار ثالثی دی پیشکش دا خیرمقدم کردا اے۔ اوہناں نے آکھیا کہ پاکستان ولوں اقوام متحدا دے سیکرٹری جنرل تے ایران ولوں پاک بھارت مذاکرات وچ ثالثی دی پیشکش دا وی خیرمقدم کیتا۔ پاکستان بھارت نال مذاکرات دی حمایت کردا اے پر بھارت ہمیشہ دہشت گردی دا جواب بنا کے مذاکرات توں فرار ہو جاندا اے۔
اوہناں نے آکھیا کہ پاکستان اندر بھارت دہشت گردی وچ ملوث اے تے پاکستان ولوں بھارتی جاسوسی ادارے دے اہلکار کلبھوشن یادیو نوں پھڑن نال پاکستان دے موقف نوں ہور تقویت ملی اے۔ اوہناں نے آکھیا کہ بھارت لائن آف کنٹرول دی مسلسل خلاف ورزی کردا اے تے ایہ عمل دوویں ملکاں وچکار 2003دے فائر بندی سمجھوتے دی خلاف ورزی اے، عالمی برداری نوں بھارتی جارحیت دا نوٹس لینا چاہیدا۔
