نیو کراچی وچ بیوی نے شوہر نوں زندا ساڑ دِتا

کراچی (پاکستان نیوز پوائنٹ 04 اگست 2016ء) نیو کراچی بلال ٹاؤن وچ مبینا طور اُتے سنگ دل بیوی نے اپنے ای شوہر نوں پٹرول سُٹ کے اگ لا دِتی، جہدے سڑ جڑ نال شوہر ہلاک ہو گیا۔ مقتول محمد سہیل 4 دھیاں دا پیو سی تے بیوی نوں منان سوہرے آیا سی۔ 37 ورھیاں دا محمد سہیل ایف بی ایریا بلاک 16 دا رہائشی سی جو منگل دی رات رُسی بیوی نوں منان نیو کراچی بلال کالونی اپنے سوہرے گیا تے بیوی نے مبینا طور اُتے گھر والیاں نال مِل کے شوہر اُتے پٹرول سُٹ کے زندا ساڑ دِتا۔

مقتول دی بھین دے مطابق سہیل دی شادی نوں 15 ورھے ہو گئے نیں تے اوہدیاں چار دھیاں نیں۔ سہیل دی بیوی اکثر اوہدے نال لڑدی رہندی سی۔ ایس وار لڑکے اپنے گھر گئی تے بھائی اوہنوں منان تے بالاں نال ملن گیا جِتھے اوہنوں زندا ساڑ دِتا گیا۔ مقتول دی بیوی دا آکھنا سی کہ سہیل ایہنوں روز ماردا دھمکاندا رہندا سی، ایس وار وی اوہنوں ماریا کُٹیا تے اوہ اپنے گھر آ گئی، سہیل دا دماغ وی ٹھیک نہیں سی، اوہنے اپنے آپ نوں آپ اگ لائی، پولیس دا آکھنا اے کہ واقعے دا مقدما درج کر لِتا گیا اے جہدے وچ 5 بندیاں نوں نامزد کیتا گیا اے جدکہ مقتول دی بیوی، سوہرا تے بہنوئی نوں گرفتار کر لِتا گیا۔ تفتیشی افسر دے مطابق مقدمے وچ نامزد ہور بندیاں دی گرفتاری لئی چھاپے مارے جا رہے نیں۔