اسلام آباد(پاکستان پوائنٹ نیوز06۔مارچ2017ء) تحریک انصاف دے چیئرمین عمران خان نے آکھیا اے کہ کدی اینی باقاعدگی نال سکول نہیں گیا جِنا پاناما کیس وچ سپریم کورٹ گیا واں، نجم سیٹھی الیکشن فکسر اے، پی ایس ایل دے کامیاب انعقاد اُتے نجم سیٹھی نوں زیرو کریڈٹ دیواں گا۔ تفصیل دے مطابق اج بنی گالا وچ سپریم کورٹ دے رپوٹرز نال ملاقات دوران گل بات کردے ہوئے عمران خان نے آکھیا کہ پاناما معاملے اُتے جو کر سکدے ساں کیتا۔
ایس توں زیادا اسیں کُجھ نہیں کر سکدے تے جج آﺅٹ سٹینڈنگ نیں۔ اوہناں نے اک سوال دے جواب وچ آکھیا کہ پی ایس ایل دے کامیاب انعقاد اُتے نجم سیٹھی نوں زیرو کریڈٹ دیواں گا بلکہ الیکشن فکسر نوں پی ایس ایل دا چیئرمین بنا دِتا گیا اے۔ ایس توں پہلے بنی گالا وچ تحریک انصاف دے چیئرمین عمران خان دی صدارت ہیٹھ پارلیمانی رہنماواں دا اجلاس ہویا۔ اجلاس وچ منی لانڈرنگ اُتے امریکی سٹیٹ ڈیپارٹمنٹ دی رپورٹ دے مندرجات داجائزا لِتا گیاجدکہ گردشی قرضیاں دے کِھلار وچ غیر معمولی وادھے دے مختلف پہلوواں اُتے غور وی کیتا گیا، اجلاس وچ عمران خان نے پارلیمانی رہنماواں نوں منی لانڈرنگ تے گردشی قرضیاں دا معاملا چھیتی ای پارلیمان وچ چُکن دی ہدایت کر دِتی۔
میڈیا رپورٹس دے مطابق چیئرمین پی ٹی آئی عمران خان نے اجلاس نال خطاب کردے ہوئے آکھیا کہ معیشت نوں کرپشن تے منی لانڈرنگ وچ ملوث گروپ دے رحم و کرم اُتے نہیں چھڈ سکدے۔ منی لانڈرنگ بارے اسحاق ڈار دا اعترافی بیان اک حقیقت اے۔ اوہناں نے آکھیا کہ گردشی قرضے نواز حکومت دے سکینڈلز وچوں اک ہور سکینڈل اے۔ وزیر اعظم نے معمول دے طریقا کار خلاف ادائیگیاں دے آڈٹ دی اجازت نہیں دِتی۔ اوہناں دا کہنا سی کہ نواز شریف نے حکومت وچ آﺅندے ای ارباں رُپئے گردشی قرضیاں دی مد وچ دِتے۔ عمران خان نے آکھیا کہ پاناما وانگ ایس معاملے نوں وی پی ٹی آئی انجام تک پہنچائے گی۔ عمران خان نے خبردار کیتا کہ پارلیمان وچ حکومت نے ساڈا راہ روکیا تے سپریم کورٹ جاواں گے۔
