شمالی وزیرستان(پاکستان پوائنٹ نیوز03۔مارچ2017ِء) وزیر اعظم میاں نواز شریف نے کرم تنگی ڈیم دا نینہ پتھر رکھ دِتا، کرم تنگی توں 84.4میگاواٹ بجلی پیدا کیتی جا سکے گی۔ نجی ٹی وی دے مطابق وزیر اعظم نواز شریف شمالی وزیرستان دے دورے اُتے پہنچے۔ وزیر اعظم نواز شریف نے اوتھے پن بجلی دے منصوبے کرم تنگی دا نینہ پتھر رکھیا۔ کرم تنگی ڈیم دو مرحلیاں وچ مکمل ہووے گا۔
ڈیم دا پہلا مرحلا اگلے تن ورھیاں وچ پورا ہو جائے گا۔ ایس موقعے اُتے وزیر اعظم میاں نواز شریف نال مولانا فضل الرحمان وی سن۔ بعدوں وزیر اعظم نواز شریف نے تقریب نال خطاب کردے ہوئے آکھیا کہ کرم تنگی ڈیم دی اُساری ایس گل دا اعلان اے کہ خوف تے فساد ختم ہو گیا تے اج محبت تے اخوت دی حکمرانی دا دور شروع ہو گیا۔ اوہناں دا کہنا سی کہ انھیری رات نوں چانن وچ بدلنا آسان نہیں ہوندا، قوم دہشت گردی خلاف اکٹھی اے، ایتھے دہشت گرداں دا قبضہ سی پر اج معاملات فیر لوکائی دے ہتھ وچ آ رہے نیں۔
اوہناں نے آکھیا کہ خطے تے پورے پاکستان نوں دہشت گردی دے فتے توں نجاب مل گئی اے۔ قوم نے بڑیاں قربانیاں دِتیاں، لوکاں نے نقل مکانی دا عذاب بھگتیا، پاک فوج تے پولیس دے جوان شہید ہوئے پر قربانیاں رنگ لیائیاں تے کامیابی ملی، سیاسی جماعتاں تے ساریاں صوبائی حکومتاں دی سانجھ نال ایہ ممکن ہو سکیا اے۔ اوہناں نے آکھیا کہ سانوں پاکستان دی معاشی ترقی و خشحالی لئی وی اکٹھے ہونا پئے گا، سی پیک ملکی ترقی دا مظہر اے۔
اوہناں دا کہنا سی کہ سی پیک جدوں مکمل ہووے گا نہیں پتا کہ کون اقتدار وچ ہووے گا پر تاریخ یاد رکھے گی کہ ایس منصوبے دی تکمیل لئی کہنے کِنا کردار ادا کیتا۔ اوہناں نے آکھیا کہ فاٹا نوں قومی دھارے وچ لیان دا عمل شروع کر دِتا اے۔ فاٹا دی ترقی ساڈی ترجیح اے۔ اسیں سارےاں سیاسی جماعتاں نوں اعتماد وچ لے کے ہن فاٹا نوں ترقی دِتی جا رہی اے۔ اوہناں دا کہنا سی کہ ایتھے ہن یونیورسٹیاں تے تعلیمی ادارے، صحت دے مرکز تے سڑکاں وی بنن گیاں۔
وزیر اعظم نے آکھیا کہ فاٹا نوں آئینی دھارے وچ شامل کرن لئی قانون سازی تے این ایف سی وچ حصہ رکھیا جائے گا۔ اوہناں دا کہنا سی کہ فاٹا وچ ایف سی آر دا خاتما کیتا جا رہیا اے۔ آئی دی پیرز نوں چالو ورھے اپنے گھراں وچ آباد کیتا جائے گا۔ وزیرا عظم دا اپنے خطاب وچ کہنا سی کہ عالمی ادارے پاکستان نوں اُبھردی ہوئی معیشت قرار دے رہے نیں۔
