انقرہ(پاکستان پوائنٹ نیوز23۔فروری2017ء) وزیر اعظم میاں محمد نواز شریف نے آکھیا اے کہ پاکستان وچ حالیہ دہشت گردی دا تعلق سرحد پار توں اے، ترکی دہشت گردی روکن لئی افغانستان نال گل بات کرے، فوجی بغاوت ناکام بنان اُتے ترک قوم نوں سلیوٹ پیش کردے آں، 15جولائی نوں فوجی بغاوت دے موقعے اُتے ترک پارلیمنٹ تے لوکائی دی بہادری ویکھی۔ میڈیا رپورٹس دے مطابق وزیر اعظم نواز شریف ترک پارلیمنٹ نال خطاب کرن پارلیمنٹ پہنچے تے ترک سپیکر نے پاک ترک زندہ باد دا نعرا لا کے وزیر اعظم دا استقبال کیتا۔
وزیر اعظم نواز شریف نے خطاب کردے ہوئے آکھیاکہ مینوں ترکی آ کے بہت خشی ہوئی۔ پاکستانی قومی ترک لوکائی دے موڈھے نال موڈھا جوڑ کے کھلوتی اے۔ اوہناں نے آکھیا کہ پاکستانی لوکائی ترکی دیاں جمہوری قدراں دا احترام کردی اے۔ وزیر اعظم نے آکھیا کہ 15جولائی نوں فوجی بغاوت دے موقعے اُتے ترک پارلیمنٹ تے لوکائی دی بہادری ویکھی۔ وزیر اعظم نواز شریف نے ترکی وچ فوجی بغاوت دی مذمت کردے ہوئے آکھیاکہ فوجی بغاوت ناکام بنان اُتے ترک قوم نوں سلیوت پیش کرنا واں۔
بعد وچ اوہناں نے میڈیا نال گل بات کردے ہوئے لاہور ڈیفنس دھماکے دی مذمت کیتی تے آکھیاکہ دہشت گردی خلاف ساڈا عزم پَکا اے، حکومت دہشت گردی توں نہ گھبرائے تے نہ ڈرے گی۔ اوہناں نے دھماکے وچ انسانی جاناں چلے جان اُتے دُکھ دا وکھالا کیتا۔
