لاہور(پاکستان پوائنٹ نیوز22۔فروری2017ء) تحریک انصاف نے ایمرجنسی، آپریشن تھیڑ تے آئی سی یو وچ روگیاں دے علاج لئی ورتی جان والی سکر مشین جنرل ہسپتال نوں عطیہ کر دِتی۔ تفصیل دے مطابق پی ٹی آئی دے رکن پنجاب اسمبلی ڈاکٹر مراد راس، رہنما تحریک انصاف عائشہ شاہنواز تے منصور احمد نے جنرل ہسپتال دا دورا کیتا۔ ایس موقعے اُتے تحریک انصاف دے وفد نے پرنسپل جنرل ہسپتال غیاث النبی طیب نال ملاقات کیتی۔
ملاقات دوران تحریک انصاف دے وفد نے جرمنی توں درآمد کیتی گئی سکر مشین ہسپتال نوں عطیہ کیتی۔ پرنسپل جنرل ہسپتال غیاث النبی طیب دے مطابق متعلقا مشین ایمرجنسی، آئی سی یو تے آپریشن تھیڑ وچ خطرناک حالت وچ موجود روگیاں دے علاج لئی ورتی جائے گی۔ ڈاکٹر مراد راس دے مطابق ہسپتال ولوں تن مشیناں دا مطالبا کیتا گیا سی جہناں وچوں اک مشین دے دِتی گئی اے، ہور دو مشیناں وی عطیہ کیتیاں جان گیاں۔ ایس موقعے اُتے مراد راس دا ہورکہنا سی کہ حکومتی ترجیحاں صحت نہیں، سڑکاں تے پل نیں، ایہو وجہ اے کہ اج ہسپتالاں وچ روگیاں نوں سہولتاں نہیں مل رہیاں تے پرائیویٹ سیکٹر سرکاری ہسپتالاں دی مدد کر رہیااے۔
