اسلام آباد(پاکستان پوائنٹ نیوز22۔فروری2017ء) وزارت داخلا نے پنجاب وچ رینجرز نوں اختیارات دین دی باقاعدا منظوری دے دِتی۔ بدھ نوں وزیر داخلا چودھری نثار علی خان دی صدارت ہیٹھ اعلا سطحی اجلاس ہویا، اجلاس وچ قومی سلامتی دے مشیر جنرل (ر) ناصر جنجوعہ، سیکرٹری داخلا، چیف سیکرٹری پنجاب، ہوم سیکرٹری، آئی جی پنجاب تے ہور سینئر افسراں نے رلت کیتی۔
اجلاس دوران وزیر داخلا چودھری نثار علی خان نے پنجاب وچ رینجرز نوں اختیارات دین دی باقاعدا منظوری دِتی۔یاد رہوے کہ رینجرز نوں اختیارات انسداد دہشت گردی ایکٹ دے تحت 60دِنا لئی دِتے جا رہے نیں۔ تعیناتی دوران رینجرز دہشت گرداں خلاف کارروائی وچ پولیس تے قانون نافذ کرن والے اداریاں دی مدد کرے گی۔ وزیر داخلا نے آکھیا کہ حکومت دہشت گردی دے خاتمے لئی پر عزم اے تے ایس سلسلے وچ صوبیاں نوں ہر قسم دی مدد دِتی جائے گی۔ اوہناں نے آکھیا کہ دہشت گرد تے اوہناں دے سہولت کار جتھے وی ہون گے اوہناں دا پچھا کیتا جائے گا تے اوہناں نوں کردار تک پہنچایا جائے گا۔ وزیر داخلا نے آکھیا کہ دہشت گرداں خلاف جنگ لئی اکٹھ دی لوڑ اے۔
