لاہور(پاکستان پوائنٹ نیوز17۔فروری2017ء) وزیر اعلا پنجاب میاں محمد شہباز شریف نے آکھیا اے کہ لاہور وچ دہشت گردی کرن والیاں نوں گرفتار کر لیا گیا اے، دھماکا کرن والا آپ مارو بمبار افغانستان توں آیا سی، گرفتار سہولت کار انوار الحق دا تعلق باجوڑ ایجنسی توں اے، پولیس افسر نوں مبارکباد پیش کردے آں۔ تفصیل دے مطابق اج لاہور وچ پریس کانفرنس کردے ہوئے وزیر اعلا پنجاب میاں محمد شہباز شریف نے دسیا کہ دہشت گرد نیٹ ورک افغانستان وچ بِہ کے پاکستان اندرکارروائی کر رہیا اے۔
اوہناں دا کہنا سی کہ آخری دہشت گرددے خاتمے تک جنگ جاری رہوے گی۔ دہشت گرداں کولوں اک اک خون دے قطرے دا حساب لواں گے۔ وزیر اعلا پنجاب نے آکھیا کہ چھیتی ای وزیر اعظم ہلاک ہون والے لوکاں دے وارثاں لئی پیکج دا اعلان کرن گے۔ اوہناں نے آکھیا کہ دہشت گرداں نوں ہن مقامی بینڈلر نہیں مل رہے ایس لئی اوہ افغانستان توں آ رہے نیں۔اک سوال دے جواب وچ اوہناں نے آکھیا کہ فوجی عدالتاں بالکل قائم ہونیاں چاہیدیاں۔
اوہناں دا کہنا سی کہ اسیں فوجی عدالت دی حمایت کردے آں۔ وزیر اعلا نے آکھیا کہ دہشت گرد پاکستانی قوم نوں شکست نہیں دے سکدے۔ ایس موقعے اُتے سہولت کارا انور الحق دا اعترافی بیان وی چلایا گیا۔ سہولت کارر نے اپنے بیان وچ مَنیا کہ میں ای آپ مارو حملا کرن والے نوں لاہور لے کے آیا سی۔
