کراچی(پاکستان پوائنٹ نیوز06۔نومبر۔2018ء) وفاقی تحقیقاتی ادارے (ایف آئی اے) دے سائبر کرائم ونگ دے سربراہ نے آکھیا اے کہ سکیورٹی بریج وچ تقریبن سارے پاکستانی بنکاں دا ڈیٹا چوری کر لیا گیا اے۔ ایف آئی اے سائبر کرائمز دے ڈائریکٹر کیپٹن (ر) محمد شعیب نے نجی نشریاتی ادارے نوں دسیا کہ سانوں ملن والیاں رپورٹاں دے مطابق پاکستانی بنکاں دا ڈیٹا مبینہ طور اُتے ہیک کر لیا گیا اے۔
معاملے اُتے ہور وضاحت منگن اُتے اوہناں نے دسیا کہ ملک وچ کم کرن والے بُہتے بنک ہیکنگ دی زد وچ آئے نیں۔ اوہناں نے دسیا کہ ایف آئی اے نے سارے بنکاں دے سربراہواں تے سکیورٹی انتظامیہ دا اجلاس سدیا اے۔ اوہناں دا آکھنا سی کہ بنک لوکائی دے پیسیاں دے رکھوالے ہوندے نیں پر جے اوہناں دی سکیورٹی ناقص ہوئے تے اوہدے ذمے وار اوہ آپ ہوندے نیں۔ محمد شعیب دا آکھنا سی کہ اجے پتا نہیں چلیا کہ ایہ ڈیٹا کدوں چوری کیتا گیا۔ اوہناں دے مطابق تحقیقاتی ادارہ ہیکنگ بارے 100توں ودھ کیساں دیاں تحقیقات کر رہیا اے۔
