لاہور(پاکستان پوائنٹ نیوز13۔جنوری2017ء) صوبائی دارالحکومت لاہور دی آبادی زیادا ہون دی وجہ توں اکثر ای شہریاں نوں ٹریفک جام ورگیاں اوکڑاں دا ساہمنا کرنا پیندا اے، پر ہن ٹریفک قانون دے نال نال ٹریفک لئی بنائے گئے منصوبیاں دے نتیجے وچ ٹریفک جام دا مسئلا ختم ہو جائے گا تے شہریاں نوں ایس اوکڑ توں نجات مل جائے گی۔ یاد رہوے کہ ایس اوکڑ دے حل لئی صوبائی حکومت نے انڈر پاساں سنے سگنل فری سڑکاں وی بنائیاں پر اجے تک ٹریفک دی صورتحال وچ زیادا بہتری نہیں آ سکی۔
لاہور دی ٹریفک مینجمنٹ ایس مسئلے دا بنیادی مسئلا اے جہنوں بدلنا پئے گا۔ پنجاب سیف سٹی اتھارٹی نے پچھلے دِنا ای لاہور ٹریفک مینجمنٹ اُتے کم شروع کر دِتا اے۔ ذکر کیتی گئی اتھارٹی ولوں شہریاں وچ اک سروے کروایا گیا اے جہدے وچ شہریاں توں ٹریفک دی صورتحال نوں ہور بہتر بنان لئی تجویزاں منگیاں گئیاں۔ پنجاب سیف سٹی اتھارٹی ٹیپا (ٹریفک انجینئرنگ اینڈ ٹرانسپورٹ پلاننگ ایجنسی) نال رلکے لاہور دے مختلف علاقیاں وچ سائن بورڈ لائے جان گے۔ ٹریفک پولیس دے کُجھ افسراں نوں ٹریفک دی بہتر صورتحال تے اوہنوں مینج کرن لئی ٹریننگ واسطے دبئی وی گھلیا گیا اے۔
