قصور( پاکستان پوائنٹ نیوز26۔مئی2018ء ) قصور وچ اک وار فیر بالاں نال زیادتی دے کیساں وچ وادھاہوندا جا رہیا اے۔ قصور دے دوالی پنڈ گہلسن ہٹھاڑ وچ ملزم نے دو معصوم بالاں نوں جنسی درندگی دا نشانہ بنایا۔ جنسی زیادتی دا نشانہ بنن والیاں وچوں اک بال حساس ادارے دے اہلکار دا پُتر تے دوجا بھتیجا اے۔ پولیس نے کئی دن لنگھن مگروں آخیر مقدمہ درج کر لیا۔
حساس ادارے دے اہلکار محمد مرتضی ولوں پولیس نوں تحریری طور اُتے دتے گئے بیان مطابق اوہدا 7ورھیاں پُتر تے 8ورھیاں دا بھتیجا دوویں اے پی ایس سکول وچ پڑھ رہے نیں، سکول توں واپسی اُتے اک دن پنڈ دے رہن والے ملزم قیوم نے اوہدے پُتر نوں اغوا کر لیا تے پیلیاں وچ لیجا کے جنسی زیادتی دا نشانہ بنایا۔ بعدوں اک دن ذکر کیتے گئے ملزم نے اوہدے بھتیجے نوں وی مسجد دی لیٹرین وچ لیجا کے جنسی زیادتی د انشانہ بنایا تے بال نوں خطرناک حالت وچ چھڈ کے فرار ہو گیا۔
علاقہ واسیاں تے بالاں دے وارثاں نے مبینہ طور اُتے ایس گل دی اطلاع پولیس نوں دتی پر پولیس نے کارروائی کرن وچ دیر توں کم لیا۔ جدوں ایس گل دی خبر محمد مرتضی نوں ملی تے اوہ چھٹی لے کے پنڈ آیا تے تحریری درخاست لے کے پولیس کول گیا۔پولیس نے دوویں بالاں نال زیادتی کرن دے مقدمے درج کر لے۔ پولیس وسیلیاں مطابق ملزم قیوم نوں گرفتار کر لیا گیا اے ۔دوجے پاسے بالاں دے گواچن تے زیادتی دے واقعیاں وچ وادھے مگروں ضلع قصور وچ سخت ردعمل ویکھن نوں مل رہیا اے۔
