قصور : اک ہور بال 3دناں توں لاپتا، بازیابی لئی 50ہزار انعام دا اعلان

قصور(پاکستان پوائنٹ نیوز27۔مارچ2018ء) قصور وچ اک ہور نِکا بال لاپتا ہو گیا، فائق دے ماں پیو غم پاروں دُکھی۔ میڈیا رپورٹس مطابق ملک دے کئی علاقیاں وچ بالاں دے اغوا تے زیادتی دے واقعیاں وچ کمی نہیں آ سکی۔ قصور وچ نِکی بالڑی زینب نال زیادتی تے قتل کیس مگروں کُجھ دناں لئی واقعیاں وچ کمی ویکھی گئی پر بالاں دے اغوا دے واقعیاں وچ فیر وادھا ہوندا وکھالی دے رہیا اے۔ قصور وچ اک ہور 6ورھیاں دا بال فائق غائب ہوگیا اے۔ پولیس دا کہنا اے کہ چراغ شاہ ٹاؤن دا رہائشی فائق پچھلے تن دناں توں لاپتا اے۔ سٹی پولیس نے بال دی رہائی لئی ٹیماں بنا دتیاں نیں جدکہ پولیس نے بال دی اطلاع دین والے لئی 50ہزار رُپئے انعام دا اعلان وی کیتا اے۔ دوجے پاسے بال دے ماں پیو دُکھی نیں۔