حجرہ شاہ مقیم(پاکستان پوائنٹ نیوز21۔نومبر2017ء) حجرہ شاہ مقیم وچ دیور سنے 6ملزماں داویاہی سوانی اُتے تن سال تیکر جنسی تشدد‘ماں پیو دی عزت ، تن بالاں دے مستقبل تے جان چلی جان دے ڈر توں ظلم برداشت کردی رہی، سوانی پھٹ پئی۔ پویس نے مقدمہ درج کر لیا، میڈیکل رپورٹ نے تصدیق کر دتی، پر ملزم گرفتار نہ ہو سکے۔ تفصیل مطابق حجرہ شاہ مقیم دے دوالی پنڈ 2Dدی سوانی کوثر بی بی دی مدعیت وچ درج ہون والے مقدمے وچ دل نوں ہلا دین والے انکشافات ساہمنے آ ئے نیں۔
سوانی نے این این آئی نال گل بات کردے ہوئے آکھیا اے کہ اوہدا ویاہ چھ سال پہلاں لیاقت علی نال ہویا جہدے وچ اوہدیاں تن دھیاں پیدا ہوئیاں۔سوانی دا کہنا اے کہ تن ورھے پہلاں جدوں اوہدی ماں فوت ہو گئی تے اوہنوں درندہ صفت سوہریاں نے نڈر ہو کے جنسی زیادتی دا نشانہ بنانا شروع کر دتا۔کوثر بی بی مطابق جنسی تشدد دا نشانہ بنان والیاں وچ اوہدے دیور سنے چھ بندے جہناں وچ تن حقیقی بھرا شوکت علی، اشفاق عرف جج، عبدالرزاق پسران اشراف‘ اشرف ولد موسی، ساجد ولد سلیم، سرور ولد صدیق شامل نیں، جوکہ اوہنوں اسلحے دے زور اُتے قتل کرن دیاں دھمکیاں دیند ے ہوئے پچھلے تن ورھیاں توں لگاتار اجتماعی زیادتی دا نشانہ بناندے رہے نیں ۔
سوانی نے بیان دتا کہ پنج دن پہلاں وی ملزم ساجد نے دن دیہاڑے اک وجے اسلحے دے زور اُتے اوہدے نال جنسی زیادتی کیتی تے اوسے رات تقریبن نوں وجے ملزم شوکت نے اوہنوں جانوں مارن دی دھمکی دے کے فیر زنا کیتا ۔جہدے کارن سوانی ٹُرن پھرن جوگ نہ رہی تے اوہنوں ہسپتال پہنچایا گیا۔ ہسپتال وچ ڈاکٹراں نے وی سوانی نال جنسی زیادتی دی تصدیق کر دتی اے۔
