اسلام آباد(پاکستان پوائنٹ نیوز18۔ستمبر2017ء) کانسٹیبل دل پذیر دی بیو ی نے عدالت وچ بیان دتا اے کہ شوہر نوں دوجے ویاہ توں روکن اُتے ایہ جھوٹھا الزام لایا۔ بیوی دے بیان مگروں عدالت نے دھی نال زیادتی دے الزام وچ 25سال دی سزا بولن والے کانسٹیبل نوں بے گناہ قرار دے دتا۔ تفصیل مطابق کانسٹیبل دل پذیر دی بیوی تے کانسٹیبل دیر پذیر وچکار دوجے ویاہ نوں لے کے جھیڑا ودھ گیا سی۔
بیوی نے اپنے شوہر اُتے الزام لاؤندے ہوئے آکھیا سی کہ اوہنے اپنی دھی نال زیادتی کیتی اے۔ عدالت نے مقدمے دی سنوائی مگروں کانسٹیبل دل پذیر نوں 25سال قید دی سزا سنائی۔ تازہ ترین صورتحال مطابق دل پذیر دی بیوی دا ضمیر اچن چیت جاگ پیا۔ کانسٹیبل دی بیوی نے جسٹس شوکت صدیقی دی عدالت وچ دھی سنے پیش ہو کے شوہر دی پاک دامنی دی گواہی دے دتی۔ جسٹس شوکت صدیق نے روندے ہوئے پُچھیا کہ شوہر اُتے اینا گھٹیا الزام کیوں لایا؟جھوٹھ بولن اُتے کارروائی ہو سکدی اے۔ کانسٹیبل دی بیوی نے عذر پیش کردے ہوئے عدالت توں معافی منگی۔ جہدے مگروں عدالت نے بیوی نوں معاف کردے ہوئے کانسٹیبل دل پذیر نوں بری کر دتا۔
