غربت ہتھوں تنگ جوڑے نے دھی دے دُدھ لئی پیسے نہ ہون کارن خدکشی کر لئی

فیصل آباد(پاکستان پوائنٹ نیوز18۔جولائی2017ء) َغربت ہتھوں تنگ جوڑے نے نِکی دھی دے دُدھ دے پیسے نہ ہون اُتے خدکشی کر لئی۔ تفصیل مطابق فیصل آباد دا رہائشی 30ورھیاں دا رب نواز بے ر وزگار سی۔ رب نواز کوئی نوکری نہ ہون کارن کدی کدی سپرے کر کے اپنے گھر دا دال دلیا کردا سی۔ پچھلے دیہاڑے جدوں نواز دی بیوی نے نِکی بالڑی لئی دُدھ لیان دا آکھیا پر پیسے نہ ہون دی وجہ توں میاں بیوی وچ بحث ہو گئی، معاملا لڑائی تیکر پہنچ گیا۔ لڑائی تے روز روز دی توں ، توں، میں، میں ہتھوں تنگ آکے رب نواز نے کنک وچ رکھن والیاں زہریلیاں گولیاں کھا لئیاں تے اپنی بیوی نوں ایس حوالے نال دس دتا جہدے اُتے نسرین بی بی توں وی رہیا نہ گیا تے اوہنے وی زہریلیاں گولیاں کھا کے زندگی ختم کر لئی۔