لاہور(پاکستان پوائنٹ نیوز01۔جون2017ء) میٹرو بس، سپیڈو بس تے اورنج لائن ٹرین مگروں ہن لاہوریاں لئی اک ہور پراجیکٹ شروع کرن دا فیصلا کر لیا گیا اے۔ تفصیل مطابق وزیر اعلا پنجاب میاں محمد شہباز شریف نے لاہور دیاں تن تھاواں اُتے ’روپ ویز‘ دی فزیبلٹی تیار کرن دی ہدایت کر دتی اے۔ وزیر اعلا پنجاب شہباز شریف دی صدارت ہیٹھ اجلاس ہویا۔ اجلاس وچ صوبائی وزیر چودھری شیر علی، مجتبی شجاع الرحمان، سیکرٹری ٹرانسپورٹ، ماحولیات، ایم ڈی پنجاب ماس ٹرانزٹ اتھارٹی، کمشنر لاہور ڈویژن عبداللہ سنبل تے متعلقہ حکام نے رلت کیتی۔
اجلاس وچ پنجاب وچ روپ ویز ٹرانسپورٹ متعارف کروان دے حوالے نال تجویراں پیش کیتیاں گئیاں۔ وزیر اعلا سنے اجلاس دے ہور رلتیاں نے وی ایہناں تجویزاں دا جائزا لیا۔ وزیر اعلا نے دسیا کہ کیبل کار سسٹم تیار کرن والی غیر ملکی کمپنی پنجاب حکومت نال ایس پروگرام اُتے کم کرن لئی راضی اے۔ وزیر اعلا نے متعلقہ حکام نوں لاہور دےاں چار یاں مختلف تھاواں اُتے روپ ٹرانسپورٹ چلان لئی فزیبلٹی تیار کرن ہدایت کیتی اے۔ لاہور دے جہڑے چار پوائنٹ اُتے کیبل کار چلان دے حوالے نال گل بات کیتی گئی اے اوہناں وچ امامیہ کالونی توں ریلوے سٹیشن، مقبرہ جہانگیر توں گریٹر اقبال پارک تے جلو موڑ توں ٹھوکر نیاز بیگ دے علاقے شامل نیں۔
