لاہور(پاکستان پوائنٹ نیوز01۔اپریل2017ء) مشہور لکھارن شکیلہ جبیں ہوراں دا کہانی پراگا ’چھکالا‘ چھپ گیا۔ 152صفحیاں دے ایس کہانی پراگے وچ کل 62کہانیاں شامل نیں۔ایس پراگے وچ موجود ہر کہانی پڑھن والے نوں سوچن اُتے مجبور کر دیندی اے۔شکیلہ جبیں ہوراں کہانیاں نوں نویں رنگ ڈھنگ نال جانو کرواکے کئی رنگ دے کرداراں دیاں کہانیاں الیکیاں نیں جو ساڈے آل دوالے ای ٹُریا ں پھِردیاں لگدیاں نیں۔
انسں دے بے مُکھ تے کرب والے احساس نوں شکیلہ جبیں ہوراں نے بہت سُچجے انداز نال بیانیا اے۔نویں موضوع تے نویں تکنیک کہانی نوں چار چن لا دیندی اے شکیلہ جبیں ایس پراگے وچ پڑھنہار نوں نال لے کے ٹردیاں نیں۔ہر کہانی وچ انج لگدا اے جویں کردار حیاتی جی رہے نیں تے شکیلہ جبیں اوہنا ں نوں بڑی نیجھ نال ویکھی جا رہیاں نیں۔ایس پراگے دی ہر کہانی پڑھن جوگ تے سلاہن جوگ اے آس ایہ ای اے کہ پڑھن ہاراں توں ایس نوں ہنگارا ملے گا۔
