لاہور(پاکستان پوائنٹ نیوز28۔مارچ2017ء) فیس بک اُتے بنن والے جعلی اکاﺅنٹ دی وجہ توں لاہور دی رہائشی سوانی دا گھر تباہ ہو گیا جدکہ سوانی نے معاملے دے حل لئی عدالت نال رابطا کر لیا۔ تفصیل دے مطابق لاہور دی رہائشی اک سوانی نے سیشن عدالت وچ اک اجیہے بندے خلاف درخاست دائر کیتی اے جوسوانی دے ناں توں مبینہ طور اُتے جعلی فیس بک اکاﺅنٹ چلا رہیا اے، درخاست وچ آکھیا گیا اے کہ جدوں سوانی دے خاوند نے فیس بک اُتے اپنی گھر والی دے ناں توں اکاﺅنٹ ویکھیا جہدے اُتے سوانی دی تصویر وی لگی ہوئی سی، نوں ویکھ کے اوہدے خاوند نے نا صرف ایس گل اُتے سوانی نوں گھروں کڈھ دتا بلکہ اوہدے توں وکھ ہون بارے وی غور شروع کر دتا۔
سوانی دا کہنا اے کہ اوہ لمے چر توں سوشل میڈیا دی ورتوں کر رہی اے تے راجا خلیل ناں دے بندے نے میرے اصلی اکاﺅنٹ توں میری تصویر لئی تے اک جعلی اکاﺅنٹ بنا لیا۔ سوانی دا کہنا سی کہ مینوں اوس ویلے پتا لگا جدوں میرے بھرا نوں فیس بک اُتے دوستی لئی پیغام گھلیا گیا جدکہ اوس بندے نے کئی ہور بندیاں نوںوی اجیہا پیغام گھلیا۔ سوانی دا کہنا اے کہ ایس حرکت دی وجہ توں اوہدی گھریلو زندگی تباہ ہو گئی اے ایس لئی ایف آئی اے نوں ملزم خلاف مقدما درج کرن دا حکم دتا جائے۔
