اسلام آباد(پاکستان پوائنٹ نیوز08۔فروری2017ء) انٹرنیٹ ورتیندڑاں لئی چنگی خبر ایہ اے کہ ہن 3جی تے 4جی مگروں پاکستان وچ آن والے مہینے 4-5جی ایل ٹی ای انٹرنیٹ سروس متعارف کروائی جائے گی۔ ایس سلسلے وچ انٹرنیٹ کمپنی وائی ٹرائب اپنے ورتیندڑاں نوں پاکستان وچ چالو ورھے مئی وچ ای پہلی وار تیز ترین انٹرنیٹ جی ایل ٹی ای ایڈوانس دی سہولت دیوے گی۔ رپوٹس دے مطابق وائی ٹرائب نے ایس سلسلے وچ موبائل کمپنی ہواوے نال سمجھوتے اُتے دستخط کر لئے نیں۔
منصوبے دے تحت آن والے مہینے اندر پاکستان دا تیز ترین انٹرنیٹ متعارف کروایا جائے گا جہدی سپیڈ 100Mbpsہووے گی جو کہ آن والے ورھے 2018تک 200Mbpsفی گھر ہووے گی۔ ایہو نہیں بلکہ جدوں ہور ورتیندڑ مارکیٹ وچ آن گے تے ایس ٹیکنالوجی نوں ورتدے ہوئے اوہدی سپیڈ 400Mpbsہووے گی۔ تیز ترین انٹرنیٹ دی فراہمی مگروں وائی ٹرائب ساﺅتھ ایشیا تے وچکارلے ایشیا وچ 3-5Ghz Spectrum دی تیز ترین ٹیکنالوجی متعارف کروان والا پہلا آپریٹر بن جائے گا۔ وائی ٹرائب ولوں دِتیاں جان والیاں معلومات مطابق ایہ نیٹ ورک اپ گریڈیشن دا ایہ پراجیکٹ ایچ بی گروپ ولوں 50ملین ڈالر دی سرمایار کاری دے منصوبے دا حصہ اے۔
