لاہور(پاکستان پوائنٹ نیوز25۔جنوری2017ء) شاہین ائر انٹرنیشنل نوں ’برانڈ آف دی ائر ایوارڈ 2016‘ دے 7ویں ایڈیشن وچ دو انوکھے اعزازاں نال نوازیا گیا اے۔ شاہین ائر نوں ائر لائن کیٹیگری وچ ’برانڈ آف دی ائر 2015، 2016‘ تے ’برانڈ آف فار 2015، 2016‘قرار دِتا گیا۔ ایہ ایوارڈز ائر لائن نوں مسافراں نوں سفر دا جدید تے پرلطف تجربا فراہم کرن دے اعتراف وچ دِتے گئے نیں۔
ایوارڈز دین دی تقریب دا آہر برانڈز فاﺅنڈیشن نے اک مقامی ہوٹل وچ کیتا سی۔ تقریب دے اُچیچے پروہنے سینیٹ دے چیئرمین جناب رضا ربانی سن جہناںنے ایہ ایوارڈز شاہین ائر دے چیف مارکیٹنگ افسر زوہیب حسن نوں دِتے۔ ایہناں ایوارڈز دے ملن مگروں اپنی خشی دا وکھالا کردے ہوئے زوہیب حسن نے آکھیا کہ ساڈے اُتے ایہ اللہ تعالی دی مہربانی اے کہ سانوں ایہ اعزاز ملیا۔
اوہناں دا کہنا سی کہ ایہ کامیابی شاہین ائر وچ موجود ہر بندے دی محنت دا ثبوت اے۔ ایہ اعزاز ملن مگروں اسیں اپنے مسافراں لئی جدید ترین سفری سہولتاں دین تے ملک وچ فضائی سفر لئی نویں معیار قائم کرن لئی تیار آں۔ یاد رہوے کہ برانڈ آف دی ائر ایوارڈدی شروعات 2007وچ ہوئی سی۔ ایس ایوارڈ دا مقصد ہر کاروباری شعبے توں تعلق رکھن والیاں کمپنیاں وچو ں چیمپئنز دا چناﺅ کرنا اے۔ ہر سال ماہرین دا اک پینل برانڈز دے معیار تے مقدار دا جائزا لے کے مختلف کیٹگریز وچ چیمپئنز دا چناﺅ کردا اے۔
