(پاکستان پوائنٹ نیوز12۔جنوری2017ء) نیو ٹیلا تے چاکلیٹ سپریڈ نوجوان نسل خاص کر بالاں وچ بتھیری مشہور اے۔ پچھلے دِنا ای ایہ الزام ساہمنے آیاکہ نیو ٹیلا بنان والی کمپنی اپنی پراڈکسٹس وچ غیر معیاری تیل ورتدی اے جو کینسر دی وجہ بندا اے، پر ہن کمپنی نے سارے الزاماں نوں رَد کر دِتا اے۔ مئی وچ یورپی فوڈ سٹینڈرڈ نے ایس حوالے نال خبردار کردے ہوئے دسیا کہ ذکر کتیاں گئیاں شیواں وچ کوئی اجیہی شے شامل اے جو کینسر دی وجہ بندی اے۔
پام آئل نوں ہور کھان پین وستاں وچ وی ورتیا جاندا اے پر پام آئل وچ کینسر دی وجہ بنن والے اجزا شامل ہون دے الزام مگروں نیو ٹیلا ایہدے توں ڈاڈھی طرحاں متاثر ہویا۔ جہدے بعد اٹلی وچ کئی ریٹیلرز نے وی احتیاط ورتدے ہوئے چاکلیٹ سپریڈ دی ورتوں دا بائیکاٹ کر دِتا سی۔ ایس سارے معاملے دے ردعمل وچ نیو ٹیلا بنان والی کمپنی نے اک مہم چلائی جہدے راہیں ورتیندڑاں نوں ایہ یقین دوایا کہ اوہناں دی پراڈکٹ وچ اجیہی کوئی شے شامل نہیں اے ، ہور ایہ کہ اوہناں دی پراڈکٹ بالکل محفوظ اے۔
نیوٹیلا کمپنی نے اپنے بیان وچ دسیا کہ پام آئل نوں نیو ٹیلا نوں ملائم رکھن لئی ورتیا جاندا اے کیونکہ کوئی وی ہور آئل انج کر نہیں سکدا۔ پام آئل نوں 200ڈگری اُتے گرم کیتا جاندا اے جہدے توں ایہدے وچ اک فیٹی ایسڈ پیدا ہوندا اے۔ رئٹرز ولوں دِتے گئے آنکڑیاں مطابق دوجے کسے وی آئل دی ورتوں نال پراڈکٹ دی لاگت 22ملین ہو جائے گی پر کمپنی ولوں کوئی آنکڑے نہیں دَسے گئے۔
