دبئی(پاکستان پوائنٹ نیوز13۔دسمبر2016ء) دبئی حکومت نے سرمایا کاراں توں اپنے جدی ملکاں وچ ٹیکس ادائیگیاں بارے پُچھ گچھ کرن دا فیصلا کر لیا اے۔تفصیل دے مطابق ٹیکس چوری مختلف ملکاں لئی سِر دا درد بن گئی اے، ایسے صورتحال توں چھٹکارا حاصل کرن لئی اک انٹرنیشنل ٹیکس کمپلائنس نے آن والے ورھے جنوری توں دبئی وچ ایس مسئلے دا حل کڈھن دا فیصلا کر لیا اے۔
وسیلیاں دے مطابق ایس ضمن وچ دبئی وچ موجود بنکاں نے 35ارکان اُتے مشتمل اقتصادی و ترقیاتی تعاون دی تنظیم (OECD)جہدے وچ زیادا تر یورپی ملکاں دے بندے شامل نیں دے حکم دے مطابق اپنے ورتیندڑاں نوں اک بین الاقوامی پالیسی توں آگاہ کر دِتا اے، ایس پالیسی دے تحت ٹیکس دی ادائیگی تے ٹیکس دی تکمیل نوں یقینی بنایا جائے گا جدکہ ایہ پالیسی ٹیکس نادہندڑاں لئی اوکڑاں پیدا کرے گی۔
اک مشہور بنک HSBCنے ایس گل دی تصدیق وی کیتی کہ اوہناں نے اپنے سارے ورتیندڑاں نوں ایس پالیسی بارے اک سرکلر گھل دِتا اے۔ دبئی وچ وَسن والے غیر ملکی باشندے خاص کر پاکستانی جہناں نے اجے تیکر پاکستان وچ اپنے موجود اثاثے ظاہر نہیں کیتے، نوں خبردار ہونا چاہیدا کہ آن والے ورھے جنوری 2017توں یعنی 20دن بعد عرب امارات تے ہور ملکاں ولوں سارےاں معلومات نوں عالمی پدھر اُتے شیئر کر دِتا جائے گا۔
