(پاکستان پوائنٹ نیوز22۔نومبر۔2016ء) سٹیٹ بنک آف پاکستان نے بنک وچ اکاﺅنٹ کھلوان لئی این ٹی این (نیشنل ٹیکس نمبرز) دی شرط ختم کردِتی اے۔ تفصیل دے مطابق سٹیٹ بنک آف پاکستان نے سا رے بنکاں نوں ہدایت جاری کیتی اے کہ کسے وی شہری نوں این ٹی این نہ ہون پاروں اکاﺅنٹ کھلوان یاں ہور بنک بارے سہولتاں نہ دین توں ہرگز انکارنہ کیتا جائے۔ سٹیٹ بنک ولوں جاری اک بیان وچ آکھیا گیا اے کہ شہریاں ولوں کئی شکایتاں مل رہیاں نیں کہ این ٹی این، جہنوں فیڈرل بورڈ آف ریونیو (ایف بی آر) ولوں جاری کیتا جاندا اے نہ ہون پاروں کئی بنک اوہناں دے اکاﺅنٹ نہیں کھول رہے، سیلز ٹیکس یاں این ٹی این بنک وچ اکاﺅنٹ کھلوان لئی ہور شیواں وچوں اک اے۔
سٹیٹ بنک دا کہنا اے کہ این ٹی این نہ ہونا کسے شہری دے بنک اکاﺅنٹ نہ کُھلن دی وجہ نہیں ہونا چاہیدا۔ سٹیٹ بنک نے ہور آکھیا کہ شہریاں نوں اکاﺅنٹ کھلوان دے سلسلے وچ سہولتاں دینیاں چاہیدیاں تے این ٹی این نوں ایف بی آر ولوں جاری ہون دے بعد ای وصول کیتا جائے۔
