اسلام آباد(پاکستان پوائنٹ نیوز04۔مارچ2017ء) پاکستان دی سبھ توں وڈی آن لائن شاپنگ ویب سائٹ ’دراز ڈاٹ پی کے‘ وِکن دا امکان ۔ تفصیل دے مطابق آن لائن شاپنگ ویب سائٹ ’علی بابا‘ دے بانی پاکستان دے دورے اُتے نیں۔ اک پریس بریفنگ دے مطابق علی بابا ویب سائٹ دے حکام نے وفاقی وزیر خزانا پاکستان اسحاق ڈار نال ملاقات کیتی اے۔ علی بابا دے حکام پاکستان اندر انفارمیشن ٹیکنالوجی دے شعبے وچ چالو سمے ہون والی ترقی توں متاثر ہوئے۔
ملاقات وچ اسحاق ڈار نے علی بابا دے آفیشل حکام نوں دسیا کہ پاکستان وچ 11فیصد موبائل فون ورتیندڑ پیسیاں دے لین دین لئی آن لائن سہولتاں نوں ورتدے نیں۔ اسحاق ڈار نے علی بابا ویب سائٹ دے حکام نوں ایس گل اُتے راضی کیتا کہ اوہ پاکستان وچ انٹری کرن۔ ’علی بابا ویب سائٹ جہنے نِکے بزنس میناں تے ہور کاروباری بندیاں دی مدد کیتی‘ بارے آکھیا جا رہیا اے کہ اوہدے مالک نے ’دراز ڈاٹ پی کے‘ جو کہ پاکستان دی سبھ توں وڈی آن لائن شاپنگ سائٹ اے، نوں مُل لین وچ دلچسپی دا وکھالا کیتا اے جدکہ کئی وسیلیاں نے ایہ وی دسیا کہ ایس حوالے نال ’دراز ڈاٹ پی کے‘ دے حکام نال گل بات وی شروع ہو گئی اے۔
ناں نہ دَسن دی شرط اُتے ای کامرس دے اک ماہر نے دسیا کہ علی بابا لئی پاکستان وچ ’دراز ڈاٹ پی کے’ مُل لین توں وکھ کوئی بہتر آپشن موجود نہیں اے تے سی پیک راہیں پاکستان وچ سرمایا کاری دی دوڑ وچ شامل ہون والے ملک چین مگروں ہن علی بابا توںبہتر ’دراز ڈاٹ پی کے‘ دا کوئی چنگا خریدار وی نظر نہیں آﺅندا۔ ایتھے ایہ گل وی ذکر جوگ اے کہ علی بابا دی گنتی دنیا دے وڈے ای کامرس پلیئرز وچ ہوندی اے۔ وسیلیاں نے دسیا کہ علی بابا دے آفیشلز اجے تک اسلام آباد وچ نیں پر اجے حکام ولوں کسے وی فیصلے بارے کُجھ نہیں آکھیا جا سکدا۔
