کراچی(پاکستان پوائنٹ نیوز04۔مارچ2017ء) چینی کمپنی نے پاکستان وچ سستیاں الیکٹرک گڈیاں متعارف کروا دِتیاں نیں۔ تفصیل دے مطابق کراچی وچ ہون والے آٹو شو 2017وچ چینی کمپنی نے سستیاں الیکٹرک گڈیاں متعارف کروائیاں جہناں دی فیکٹری قیمت 3توں 5ہزار ڈالردے نیڑے اے۔ آٹو شو وچ متعارف کروائیاں گئیاں جدید گڈیاں دے 3بوہے نیں چار سیٹاں نیں۔میڈیا رپورٹس دے مطابق والی بائی منی ای وی کار دے تن ماڈلز آن والے ورھے پاکستان وچ ویچن لئی پیش کیتے جان گے۔
جہناں وچ اکانومی، کمفرٹ ایبل تے لگژری ماڈلز وی شامل نیں۔ اکانومی ماڈل دی قیمت تن ہزار ڈالر، کمفرٹ ایبل ماڈل دی قیمت چار ہزار ڈالرجدکہ لگژری ماڈل دی فیکٹری پرائس 5ہزار ڈالر ہووے گی۔ ایکسپو سینٹر وچ موجود چینی کمپنی دے نمائندےاں نے دسیا کہ اوہناں دی کمپنی چین وچ الیکٹرک گڈیاں بنان والیاں وڈیاں کمپنیاں وچوں اک اے جو ڈیلی اک ہزار گڈیا تیار کردی اے۔
اوہناں نے دسیا کہ الیکٹرک کاراں دی فی کلو میٹر لاگت 1رُپئے توں وی گھٹ ہووے گی۔ گڈی نوں گھریلو بجلی (220واٹ) نال وی چارج کیتا جا سکدا ے جدکہ اُچیچی پاور چارنگ سسٹم راہیں گھٹ ویلے وچ بیٹری فل چارج کیتی جا سکدی اے۔ اک وار پوری طرحاں چارج ہون مگروں گڈی 60کلو میٹر فی گھنٹے دے حسان نال 120کلو میٹر پندھ طے کر سکدی اے۔ چینی کمپنی دے نمائندے الیکٹرک کاراں دی پاکستان وچ فروخت لئی پارٹنرز تے ڈیلرز دی تلاش وچ نیں۔
کمپنی آن والے ورھے گڈیاں پاکستان وچ فروخت کرن دا ارادا رکھدی اے۔ چینی کمپنی پاکستان وچ فروخت کیتیاں جان والیاں گڈیاں دی 5سال یاں 80ہزار کلو میٹر رننگ دی وارنٹی وی دیوے گی ایس توں وکھ پاکستان وچ گڈیاں دی مرمت تے پرزیاں دی فراہمی لئی وی کوئی مناسب بندوبست کیتا جائے گا۔ یاد رہوے کہ بجلی نال چلن والیاں گڈیاں وچ پاور ونڈو، المونیم لائے رم، ڈسک بریک، سینٹرل لاکنگ سسٹم، ریموٹ کینز، ائر کرلر (آپشنل) ائر ہیٹر سنے ریڈیو، یو ایس بی، اے یو ایکس، فرنٹ کیمراڈسپلے، ویڈیو تے سپیکرز دی سہولت وی موجود اے۔
