اقوام متحدہ(پاکستان نیوز پوائنٹ 01 فروری2016ء) اقوام متحدہ نا کنڈآن جنیوا ٹی مروک آ شام امن مذاکرات ءِ 20 فروری اسکان پد بٹنگانے۔ ذرائع ابلاغ نا رداٹ مست آن پک مروک شیڈول نا رداٹ دا مذاکرات 8فروری آ جنیوا ٹی بناء مروئی ئس ولے روسی وزیر خارجہ سرگئی لاروف گدرینگوک آ ہفتہ دا پڑو کریسس کہ اوٹی تاخیر کننگک ولے او دانا ہچ ءُ سوب اس پاتویسس۔ اقوام متحدہ نا خصوصی ایلچی شام ستافن ڈی مستورا سلامتی کونسل نا بند کمرہ نا دیوان اٹی جنیوا امن مذاکرات ءِ پد بٹنگ نا پڑو ءِ کرینے و پارینے کہ داڑآن حزب اختلاف ءِ زیات گچین تیاری نا موقع ملک و اوٹی زیات آن زیات نمائندہ ساڑی مننگ کیرہ۔
سٹافن ڈی مستورا دیوان اٹی جنیوا مذاکرات نا تیاری تا بابت اسہ رپورٹ اس پیش کرینے۔ اوپارے کہ دا مذاکرات کن سلہ نامہ 8فروری آ گدریفنگک۔ دیوان آن مست اقوام متحدہ ٹی برطانوی سفیر میتھیورائے کرافٹ صحافی تتون ہیت وگپ کرسا پارے کہ ننے داہیت آ بھاز گڑتی ءِ کہ جنیوا مذاکرات ءِ پد بٹنگ انگ ءِ۔ اگہ دا مذاکرات نا بنداو ءِ بدل کننگک تو ننے داڑآ ہم بھاز گڑتی مریک۔ داتواکن سلامتی کونسل نا صدر ملک سویڈن نا سفیر اولف سکوج پارینے کہ اہم ہیت دا ہیت انا پک ءِ کہ اقوام متحدہ مذاکرات نا بروک آ دور انا سروکی ءِ کیک۔
