اسلام آباد (پاکستان پوائنٹ نیوز۔28 جولائی۔2016) پاکستان دوٹوک لوز اٹی صفا کرینے کہ کشمیر نا ویل ءِ ایجنڈہ ٹی ہتنگ آن بیدس بھارت تون جامع مذاکرات مننگ کپک، بھارت تون ہراتم کہ مذاکرات مس کشمیر بنداوی ویل مریک، اقوام متحدہ نا جنرل اسمبلی نا دیوان اٹی کشمیر نا ویل ءِ پبی وڑاٹ چست کینہ، حریت راہشون آتا پدریسہ نظربندی نا مذمت ءِ کینہ، اوغانستان تون سیم آ ٹریفک ءِ کنٹرول کننگ کن گام گیج کرینن، بھارتی وزیر داخلہ راج ناتھ سنگھ بروک آ تو سارک وزارتی دیوان اٹی شرکت کن پاکستان آ بریک۔
پنچ شنبے آ ہفتہ وار پریس بریفنگ نا وخت آ دفترخارجہ نا ترجمان محمد نفیس زکریا پارے کہ کشمیر نا بابت پاکستان نا اصولی موقف صفا ءِ ، کشمیر نا ویل ءِ ایجنڈہ غا ہتنگ آن بیدس بھارت تون جامع مذاکرات مفک، پاکستان اقوام متحدہ تون اوار غٹ جہانی فورم آتیا کشمیر نا ویل ءِ پبی وڑاٹ چست کرینے، اینخو نا سال اقوام متحدہ نا جنرل اسمبلی نا دیوان اٹی ہم دا معاملہ ءِ چست کننگک۔
ترجمان پارے کہ سلاہکار خارجہ سرتاج عزیز مقبوضہ کشمیر اٹی بھارتی ظلم انا بابت اقوام متحدہ نا سیکرٹری جنرل، اقوام متحدہ نا انسانی حق انا کونسل و او آئی سی نا سیکرٹری جنرل تون اوار کیہی جہانی ادارہ غاتے چھٹی راہی کرینے، او آئی سی مقبوضہ کشمیر اٹی بھارتی ظلم انا سخت نوٹس ءِ ہم ہلکونے۔ ترجمان پارے کہ کشمیر ننا قومی مسخت ءِ ، پاکستان کشمیری الس نا حق خودارادیت نا مخ تفی ءِ برجاتخک۔
پاکستان مقبوضہ کشمیر اٹی حریت راہشون آتا پدریسہ نظربندی نا ترندی اٹ مذمت ءِ کیک۔ اسہ سوج اسینا ورندی ءِ ترسا ترجمان پارے کہ پاکستان رینجرز و بھارتی بارڈر سیکورٹی فورسزآتا نیام اٹ دیوان ہڑتوم آ ملک آتا نیام اٹ معمول نا بست وبند آتا بابت آن ءِ۔ دیوان اٹی بارڈر گراؤنڈرولز 1960 ء نا رداٹ آپریشنل معاملہ غاتے شرہ ٹی اتینہ۔ اِرا دے ئی دیوان (اینو) جمعہ آ لاہور اٹی چٹک۔
ترجمان تصدیق کرسا پارے کہ بھارتی وزیر داخلہ ناتھ سنگھ سارک وزارتی دیوان اٹی شرکت نا غرض آن بروک آ تو پاکستان آ بریک۔ پاک اوغان و امریکہ سہ کڑدہ ہی دیوان نا بابت آن ترجمان پارے کہ کابل اٹی سہ فریقی دیوان نا وخت آ ڈائریکٹر جنرلز ملٹری آپریشنز (ڈی جی ایم اوز) سیمی بست وبند و انصرام و سلامتی نا بابت درشان خیال کرے و بارڈر مینجمنٹ آن بابت معاملہ غاتے طے کننگ کن وڑوڈول آ اتفاق کریر۔
پاکستان اوغانستان تون سیم آ ٹریفک کنٹرول ءِ کننگ و دہشت گرد آتا توننگ کن ہم گام گیج کرینے۔ اوغان صدر اشرف غنی نا ساڑی آ بیان نا بابت ترجمان پارے کہ الزام تراشی ہچ ءُ ویل اسینا ایسری اف۔ نن وزیراعظم نوازشریف نا پرامن ہمسائیگی نا وژن آ یخین تخنہ۔ پاکستان اوغانستان اٹی امن و سوگوی نا خواہندار ءِ و داچرجوئی ٹی صرف چار کڑدہ ہی رڑآتون کمک ءِ برجاء تخک۔
اوپارے کہ دہشت گردی ننا اسیجائی ویل ءِ و داڑآ اواری کوشست آتیان اونا مون ءِ توننگ مریک۔ راجی میل جول نا ویب سائٹ فیس بک آ کشمیر آن بابت پیج ءِ مر کننگ نا بابت ترجمان پارے کہ فیس بک اٹی کاریم کروک آ بھارتی یا ایلو قومیت آتا ملازم اودے تینا مسخت کن کاریم اٹ ہتنگ ءُ ہرا فیس بک کاریم اٹ اتوک آتا اظہاررائے نا آجوئی نا سنگین خلاف ورزی ءِ۔
فیس بک غیر جانبدارمیڈیا ءِ و میڈیا ءِ اونا سخت نوٹس ءِ ہلوئی مرے۔ انڈونیشیاٹی پاکستانی شاری ذوالفقار ءِ منشیات نا ڈوہ ٹی سزائے موت نا بابت سوج آ ترجمان پارے کہ نن اومیت نا دامن ءِ دوتیان کشے تنون و آخری لمحہ اسکان تینا کوشست آتے برجاتخنہ۔ نن انڈونیشین کمامدارآتون رابطہ ٹی اُن۔ سعودی عرب اٹی ہزار آ پاکستانی تے کمپنی تا کنڈآن سلوک آ پیسہ غاتا عدم ادائیگی نا بابت سوج انا ورندی ءِ ترسا ترجمان پارے کہ پاکستان سعودی کمپنی و سعودی حکومت نا مون آدامعاملہ ءِ وار وار آ ہرفینے۔ سعودی عرب نا فرمانرواہم کمپنی تے ہزار آ ملازم آتے زوت آن زوت واجبات آتا ادائیگی نا حکم تسنے۔
